Jumys toby bir aıdyń ishinde qazaq-túrik lıseılerine aýdıt júrgizýi tıis, - dep habarlaıdy Qamshy.kz QazAqparatqa silteme jasap.
QR Bilim jáne ǵylymı mınıstrliginiń baspasóz hatshysy Áıgerim Álibekovanyń aıtýynsha, qazirgi ýaqytta jumys toby tekserýge tıisti máselelerdiń tizilimi jasalýda. Atalǵan jumys tobynyń quramyna mınıstrliktiń bilim salasyna memlekettik baqylaý qyzmetin júzege asyrýǵa ókiletti ókilderi men basqa da múddeli taraptar kiredi. Olar oqý oryndarynyń bilim berý qyzmetiniń bilim salasyndaǵy zańnama talaptaryna sáıkestigin anyqtaýy tıis.
«Oqý oryndaryna qatysty memlekettik baqylaý sharalary Qazaqstan Respýblıkasynyń Kásipkerlik kodeksinde belgilengen merzim sheginde júrgiziletin bolady jáne otyz kúnnen aspaıdy. Tekserý nátıjesinde bilim berý uıymy qyzmetiniń zańnama talaptaryna sáıkestigi nemese sáıkessizdigi týraly sheshim qabyldanady», - dep habarlady mınıstrlikten.
Esterińizge sala keteıik, 15 shilde kúni Ystambulda áskerı búlik oryn alyp, bul kóterilisti «Túrik Qarýly kúshterine enip alǵan Fetxýllaxshyl lańkestik uıymy uıymdastyrdy» dep jarıalandy. Osyǵan oraı, Qazaqstanda qoǵam arasynda KATEV qorymen qurylǵan Qazaq-Túrik lıseıleriniń taǵdyry taqyryby qyzý talqyǵa túse bastady.
Al 5 tamyzda QR Prezıdenti Nursultan Nazarbaev Túrkıaǵa sapary barysynda Qazaqstandaǵy túrik lıseıleriniń jumysyn Qazaqstan men Túrkıa bilim berý mınıstrlikteriniń mamandarynan qurylǵan birlesken jumys toby tekseretindigin málim etken edi.
Sál keıinirek QR Bilim jáne ǵylym mınıstrliginde Fethýllah Gúlenmen baılanysynyń bar-joǵyn anyqtaý úshin qazaq-túrik lıseılerin tekseretin jumys tobynyń qurylǵandyǵyn QR Bilim jáne ǵylym mınıstri Erlan Saǵadıev aıtty.
«Prezıdenttiń tapsyrmasyna sáıkes, BǴM jumys toby qurylyp, jumysyn bastady. Biz túrik tarapymen baılanysta jumys isteımiz. Alaıda bul oqý úderisine qatysy joq. Bul bizdiń qazaqstandyq mektepter jáne olar qatań tártipte elimizdiń standarttarymen qyzmet etýde. Biz bul lıseılerdi birneshe márte teksergen edik. Olarǵa qatysty eshqandaı narazylyq joq. Bul turǵyda lıseıler burynǵysynsha jumystaryn jalǵastyrady», -dedi mınıstr.
