QR Prezıdenti Nursultan Nazarbaev aldaǵy ýaqytta ótetin Úkimettiń keńeıtilgen otyrysynda halyqtyń tabysyn arttyrý men jumyspen qamtýdy qoldaýǵa qatysty tyń usynystaryn jarıalaıdy, - dep habarlaıdy Qamshy.kz QazAqparatqa silteme jasap.

Búgin altynshy saılanǵan QR Parlamentiniń ekinshi sesıasyn ashý barysynda sóz sóılegen QR Prezıdenti Nursultan Nazarbaev osylaı málimdedi.

Sóz arasynda Elbasy búgingi kúni álemdik ekonomıkalyq, saıası ahýal kúrdeli kúıde qalyp otyrǵanyna nazar aýdaryp, kóptegen damyǵan jáne damýshy elder qıyndyqty bastan keship otyrǵanyna nazar aýdardy. «Baǵanyń quldyraýy, álemdik naryqtaǵy turaqsyzdyqtar halyqaralyq saýdany álsiretti. Investısıalyq aǵymdar azaıyp, elder arasyndaǵy taýar aınalymy, eksport pen ımport almasý tómendedi. Munyń bári Qazaqstanǵa áser etpeı qoımaıdy, biz álem ekonomıkasynyń bir bólshegimiz. Biz osyǵan baılanysty barlyq baǵyttar boıynsha qarjy únemdeýge májbúr boldyq. Ekonomıkaǵa ınvestısıalar qysqardy, sonyń ishinde áleýmettik nysandardy qarjylandyrý azaıdy, keıbir qabyldanǵan sheshimder qaıta qaralyp jatyr. Soǵan qaramastan, bizdiń baǵdarlamalar sózsiz oryndalady. Degenmen, ómirdiń ózi bizden qarajatty jumsaýda asa mańyzdy isterge kóbirek kóńil bólýdi talap etip otyrǵany shyndyq. Osyndaı jaǵdaıda Úkimettiń, Ulttyq banktiń daǵdarysqa qarsy is qımyl jospary jalǵasatyn bolady», - dedi N. Nazarbaev.

Bul rette Elbasy qyrkúıek aıynyń alǵashqy onkúndiginde Úkimettiń keńeıtilgen otyrysy ótetinin aıtyp ótti. «Osy otyrysta men jumyspen qamtýdy qoldaý jáne halyqtyń tabysyn arttyrýǵa qatysty jańa sharalardy usynatyn bolamyn. Iaǵnı, ekonomıka tereń tynys alyp, damýy úshin jańa qarajattar tartý joldary, bankterdiń jumysyn jandandyrý jáne jergilikti jerlerdegi múmkindikterdi keńeıtý qarastyrylatyn bolady», - dedi Memleket basshysy.