QR Bilim jáne ǵylym mınıstrligi tizginin eks-mınıstr Baqytjan Jumaǵulov ustap turǵan 2012 jyly elimizdegi jıyrmadan astam joǵarǵy oqý orynyn biriktirý týraly bastama kóterilgen edi. Keıin bul bastamany (kezekti reformany desek te bolady) Elbasynyń usynysy retinde Elordadaǵy kóp shendi qoldap, qazirgi mınıstr Saǵadaıevtiń tusynda, ıaǵnı, 2015 jyly Qanysh Sátpaev atyndaǵy Qazaq ulttyq tehnıkalyq zertteý ýnıversıteti men Qazaq-brıtan tehnıkalyq ýnıversıteti biriktirildi. Sol biriktirýdiń bylyq-shylyǵy endi áshkerelenip jatyr, - dep habarlaıdy Qamshy.kz Abai.kz – ke silteme jasap.
Jaqynda Q.I.Sátpaev atyndaǵy Qazaq ulttyq tehnıkalyq zertteý ýnıversıtetiniń (ári qaraı - QUTZÝ) bir top oqytýshylary men qyzmetkerleri mınıstrliktiń bastamasy boıynsha taǵaıyndalǵan jańa basshylyq buıryq shyǵaryp jataqhanadan qýyp jatqanyn aıtyp, kómek suraǵan.
Atalǵan oqý ornynda dáris beretin oqytýshylardyń aıtýynsha, jańa basshylyq memleket tarapynan QUTZÝ-diń № 5 jataqhanasynan keıbir oqytýshylardy qýyp jatqan kórinedi. Sebebi jańa basshylyq pedogogıkalyq quram men ákimshiliktiń tehnıkalyq qyzmetkerlerine arnalǵan jataqhananyń jarty bóligine stýdentterdi ornalastyrmaq bolǵan. Munymen qosa belgisiz sebepterge baılanysty jataqhananyń komýnaldyq tólemaqysyn da kúrt ósirip jibergen.
Bilim jáne ǵylym mınıstrligi bastamasymen 2015 jyly Memlekettik mekeme sanalyp kelgen qos JOO – aıaq astynan Aksıonerlik qoǵamǵa aınalǵan. Al № 5 jataqanada 15-20 jyldan beri turyp kele jatqan, sonyń ishinde memlekettik qyzmetkerlerge berilýi tıis páter kezeginde 2003 jyldan beri turǵan ustazdardy 2015 jyly QUTZÝ-dyń aksıonerlik qoǵam bolýyna baılanysty páter kezeginen alyp tastaǵan. Osylaısha BǴM men rektorattyń reformasynyń kesirinen jıyrma jylǵa jýyq eńbek ótili bar oqytýshylar bir-aq kúnde pátersiz, jataqhanasyz, sandalyp qalǵan.
Ázirge salyp-uryp, jataqhanadan shyǵyrmaǵanymen, rektorat tarapynan alǵashqy eskertýler aıtyla bastapty.
Jataqhana turǵyndarynyń (oqytýshylar men qyzmetkerlerdiń) sózine sensek, olardyń keıbirine basshylyq tarapynan jumystan shyǵarýdy jeleý etip, qoqyn-loqqy kórsetý faktileri de bolypty.
Aıdyń kúni amanynda qańǵyryp qalǵan ustazdar jańa rektordyń atyna birneshe márte hat jazǵanymen, áli kezdespepti.
Lýganskaıa Sáýle, aǵa oqytýshy bolǵan:
-1996 jyldan bastap Q.Sátpaev atyndaǵy QUTZÝ-de jumys istep keldim. Al bıyl 2016 jyldyń 16 shildesinde konkýrstan ótpeı qaldyń degen jalań sebeppen meni jumystan shyǵaryp jiberdi. Konkýrstan ne sebeppen ótpeı qalǵanym da belgisiz, áıteýir aıtatyndary «schetnyı komısıa solaı eseptep shyǵardy» degen bir aýyz sóz. Men ózimniń eńbek ótilimde birde-bir ret ereje buzǵan emespin.
Men dál osy jataqhanada 1996 jyldan beri turyp kelemin. 2008 jyldan bastap páter kezegindemin. Ras, bizben birge kezekte turǵandardyń kóbisi baspanaly boldy. Al meniń kezegim áli kelmegen-di. Byltyr sol kezekten de bizdi alyp tastady. Sóıtsek biz endi memlekettik qyzmetker emes ekenbiz. QUTZÝ endi Aksıonerlik qoǵam bolyp ketken. Men –jalǵyz basty anamyn. Eki qyzym stýdent. Meni jumystan ǵana emes, endi osy ózim 20 jyldan beri turyp kele jatqan páterimnen de qýyp shyǵarmaq. Men qaıda baramyn? Memleketimizdiń ustazdarǵa jasaǵan qurmeti, jaqsylyǵynyń sońy osy ma? Nendeı sebeppen meni jumystan shyǵardy? Men endi sharasyzdyqtan eden jýýshy bolyp jumys jasaýǵa májbúrmin.
Ábdirasilova Jeńiskúl, aǵa oqytýshy:
-Meni de belgisiz sebeptermen jataqhanadan shyǵarý týraly sheshim qabyldapty. Men bul jerde 15 jyldan beri turyp kelemin. Jalǵyz basty anamyn qazir. 10 jyldan beri demikpe aýrýymen dıagnostıkalyq ortalyqta esepte turamyn. Maǵan qoıylǵan talap mynaý eken. «Nege Jeńiskúl 2 bólme alǵan?» Men 2015 jyldyń tamyz aıynan bastap zańdy dekrettik demalysymdy alǵanmyn. Sosyn anamdy ákelip qyzymdy baqtyryp otyrmyn. Al ózim kún kóris qamymen dúkende satýshy bolyp qyzmet etýge týraly keledi. Sebebi jataqhananyń aqshasyn tólemesen taǵy shyq ta shyqqa salady.
Konkýrs demekshi, QUTZÝ men QBTÝ-dy biriktirý kezinde eki ýnıversıtetke bir rektor bekitilip, bul mindet QBTÝ rektory Beısembetov Eskendir Qalybekulyna júktelgen edi.
Jańa rektor QUTZÝ-da jıi boı kórsetpegenimen onyń qolǵa alǵan reformasy munda júrgizilip jatqany anyq. Rektor konkýrsty qandaı táalap ereje boıynsha júrgizip jatqanyn ózi biledi. Al bizdiń biletingimiz, konkýrstan kóp tájirbıeli pedagogtardyń óte almaǵany. Sonyń biri QUTZÝ-de Tirshilik qaýipsizdigi jáne qorshaǵan ortany qorǵaý kafedrasynyń aǵa oqytýshysy bolǵan Nurhaıat Garıfqyzy Haırlıeva.
Basshylyq 53 jastaǵy Nurhaıat Garıfqyzyn ǵylym kandıdaty, dosent degen ataq-dárejesine qaramastan, zeınetke shyǵýyna 5 jyl qalǵanda jumystan shyǵaryp jibergen. Osydan soń óz-ózine kele almaǵan Nurhaıat Garıfqyzy aıtys bolypty.
Redaksıamyzǵa kelgen ustazdar jańa basshylyqpen kezdesý kezinde belgili bolǵandaı, jumystan shyǵarylǵandardyń kóbisi para aldy degen kúdikke ilingendigin, alaıda rektormen kezdesý kezinde prorektor Hýrshıdam Ilahýnovanyń ustazdardan para alatyndyǵy dáleldi túrde aıtylǵanymen Ilahýnovaǵa qatysty eshqandaı shara qoldanylmaǵanyn aıtady.
İńkárbaeva Elımıra, QUTZÝ oqytýshysy:
-Men osy jataqhanada otbasymmen turyp kele jatqanyma 12 jyl boldy. Al QUTZÝ-degi eńbek ótilim: 14 jyl. Onyń ústine men osy ýnıversıtettiń túlegimin. Men jumys istep kele jatqan ýaqyttyń aralyǵynda bizde birneshe rektor aýysty. Rektorlar aýysqan saıyn osy jataqhananyń turǵyndary túrtpekke ilinedi. Bizdi qaıta-qaıta shaqyryp, jataqhanadan qýalaıdy. Biz osydan ábden sharshadyq. Endi mine, Beısembetov myrza tipti keıbir jataqhana turǵyndaryn jataqhanadan shyǵarýdy bastap ketti. Biz osy ýnıversıtettiń ystyǵy men sýyǵyna shydap, qıyn-qystaý kezderde de jumys istep keldik qoı. Bul jataqhanada turǵyndardyń jaǵdaıy barlary baspana alyp ketip jatyr. Al jaǵdaılary joqtary amalsyzdan osy jerde turyp jatyr. Osy jataqhanada jalǵyz basty analar men kemtar balalar bar. Balalarymyzdyń da júrekteri aýyryp záreleri ushyp boldy. Biázge kelip «mama, bizdi shyǵaraıyn dep jatyr ma, ne?» dep suraǵanda-aq, et júregimiz syzdap sala beredi. Ár rektor kelgen saıyn jataqhananyń jambaspuly ósedi. Eger páter alýǵa jaǵdaıymyz kelse, biz bul jerde bir mınýt ta turmas edik qoı. Barar jer, basar taýymyz joq bolǵan soń, sharasyzbyz.
Túıin sóz: Hosh, jańa rektor jańa kadrlaryn ákelsin delik, BǴM-nyń bıznesmen mınıstri buryńǵy kásibine búıregi buryp, Memlekettik mekemeni Aksıonerlik qoǵamǵa aınaldyrsyn delik. Budan utatyn kim? Utylatyn kim? Qarapaıym oqytýshylardyń quqyǵyn kim qorǵaıdy? Aıdyń kúni amanynda dalada qalǵan ol adamdardyń jaǵdaıy mınıstr Erlan Saǵadıevti alańdata ma? Álde úısiz-kúısiz júrgen, endigi turyp jatqan jataqhanasynan da qysym kórip, qýylyp jatqan ustazdardyń janaıqaıyna mınıstr Erlan Kenjeǵalıulynyń túkirgeni bar ma?
QUTZÝ qyzmetkerlerine tıesili № 5 jataqanada oqytýshylar men ózge de tehnıkalyq qyzmetkerler 15-20 jyldan beri turyp kele jatyr. 2003 jyldan beri Memlekettik páter kezeginde turǵan olardy BǴM reformasynyń kesirinen turǵyn úı kezeginen alyp tastaǵan. 2016 jyldyń 26 shildesindegi jataqhana meńgerýshisi S.Medetbekovtyń buıryǵymen oqytýshalyrdy jataqhananyń bir bóligine kóshirip, qalǵan bóligi stýdentterge beriletini aıtylǵan. Eki-úsh bólmeli seksıalar bar. Ol bólmelerdiń ár qaısysy 12 sharshy metrdi quraıdy. Al bul bólmelerdiń árqaısysynyń komýnaldyq tólamaqysy 18,000,00 teńge. Tipti, muǵalimderdi jataqhananyń bir bóligine kóshirý kezinde álgi bólmelerge kúrdeli jóndeý jumystaryn júrgizý úshin QUTZÝ qyzmetkerleri óz qaltalarynan shyǵyn shyǵarǵan. Jóndeý jumystarynyń ortasha esebi – 50,000,00 teńge bolǵan. Osy kúni jańa rektordyń atyna hat joldap, máseleni sheship berýdi suraǵan 130 turǵynnyń janaıqaıyn estir qulaq tabylmaı tur. Eger BǴM bul máseleni óz qaraýyna alyp, ustazdardyń quqyǵynyń taptalmaýyn qadaǵalamaıtyn bolsa, bul bylyqty bastaǵan Saǵadıevtiń «saýdasynyń» bitkeni. Ustaz eń qadirli mamandyq deımiz-aý. Desek te, sol ustazdarymyzdyń biri satýshy, biri eden jýýshy, endi biri taksısıtke aınalyp ketkeni qalaı? Ustazdarymyzdy úısiz-kúısiz dalada qańǵyrtyp qoıyp, bizdiń BǴM balalarǵa qandaı bilim bermek?
