5 qyrkúıekte Atyraý halqy oblys atynan shyqqan  Rıo olımpıadashylary – aýyr atlet Nıjat Rahımov pen taekvondoshy Jansel Denızdi kútip aldy,- dep habarlaıdy Qamshy.kz. 

Qala halqy men olımpıadashylardyń saltanatty kezdesýi áýejaıda bastaldy, Olımpıada chempıony Nıjat Rahımovty ákesi, anasy jáne qaryndasy kútip aldy.

Qalany aralap shyqqan soń, olımpıada chempıony «Jaıyq» sport keshenine keldi. Onda N.Rahımovtyń qurmetine konsert jáne jas sportshylarmen kezdesý uıymdastyrylǵan.

     Atyraý oblysynyń ákimi Nurlan Noǵaev sportshylardy quttyqtady: – Biz senderdiń jetistikterińmen maqtanamyz, Rıo olımpıadasy bastalysymen, demimizdi ishke tartyp, oıyndy baqyladyq, – dedi N.Noǵaev. –  Óz jeńisimen N.Rahımov Qazaqstandaǵy sporttyń damýyna qozǵaý saldy, oǵan Qazaqstanda qajettiniń bári bar. Onyń el qorjynyna salǵan alǵashqy Olımpıada altyny jastar úshin keremet yntalandyrý boldy.

Memleket basshysy qazaqstandyqtar arasyndaǵy salaýatty ómir saltyn dáripteý týraly únemi aıtyp júredi jáne bizdiń sportshylardyń mundaı jetistikteri jastardyń patrıottyq sezimin oıatady, ózin ózi damytýǵa jeteleıdi.   

    Atyraý oblysynyń ákimi Nıjat Rahımovqa Astanadan úsh bólmeli páter syılady. Dál qazirgi ýaqytta N.Rahımov Astanada jattyǵýda. Al taekvondoshy Jansel Denızge 2 mıllıon teńge sertıfıkatyn tabystady. Saltanatty sóz sóıleýden keıin N.Rahımov qoldaý bildirgen qazaqstandyqtarǵa óz alǵysyn bildirdi: – Maǵan úlken qoldaý bildirgen Qazaqstan halqyna raqmet aıtamyn, – dedi Rahımov. –  Atyraý oblysyna úlken raqmet, men munda 2014 jyly keldim, osynda meni bári qoldady, barlyq oblys turǵyndaryna úlken alǵys aıtamyn!  

 Chempıonǵa arnaıy merekelik konsert uıymdastyryldy. Konsert bitken soń N.Rahımov Atyraý oblysynyń ákimi N.Noǵaevqa «selfı» jasaý týraly ótinish bildirgen.