Bıylǵy jyldyń kókteminde Vetnamdaǵy «Jylandar sırkiniń» qurylǵanyna bir jyl toldy. Nadjıa Abdrahmanova esimdi qazaqtyń qaısar qyzy negizin qalaǵan  «Jylandar sırki» álemdegi teńdesi joq biregeı joba.

Nadjıa Abdrahmanova Keńes Úkimetiniń tarqar tusynda mektep tabaldyryǵyn attap, Almatydaǵy az sandy qazaq mektebiniń birinde bilim alǵan. Aǵylshyn tilin Avstralıadaǵy Sıdneı qalasynda oqyǵan.

Ómir jolynda kásip pen mamandyqtyń birneshe túrin almastyrǵan qurbymyz 2014 jyly bárin tastap, óziniń jan qalaýymen aınalysýǵa bet burady. Onyń jan qalaýy eshkimge uqsamaý jáne ózge eshkim júrmegen ózindik sara jolyn tabý edi. Sóıtip Almatyda biraz ýaqyt jumyssyz júrgen ol Ońtústik Shyǵys Azıadaǵy tabıǵaty erekshe Vetnamǵa sapar shegedi.

Nadjıanyń bul elde eshbir tanysy ne dosy joq edi. Beıtanys elde bastapqyda dúkenshi bolyp jumys istegen qazaq qyzy taýarlar áleminen jalyǵa bastaıdy. 2015 jyly jańa tanysqan jergilikti dostarymen birlesip, «Jylandar sırkin» ashýdy uıǵarady.

Dúkendegi isin tastaǵan Nadjıa birneshe túrli jylandardy baǵatyn fermany da qurady. Qaramaǵyna «jylan arbaýshy» mamandardy jumysqa alady.

Búginde Nadjıa Abdrahmanova basqaratyn «Jylandar sırkinde» elý adam jumys isteıdi.

«Jylandar sırkine» tek vetnamdyqtar ǵana emes, shet eldikter de kóp keledi. Týrıserdi kóp qyzyqtyratyny — jylan ónerin tamashalaýdan lázzat alý, jylandy sıpaý arqyly keıbir aýrý túrinen aıyǵýdy kózdeıtinderi de bar.

«Ótkenime qarasam, qysqa merzimde talaı asýdy artqa tastaǵanymdy baıqadym. Biraq dál qazirgi ýaqytta otbasynan góri jumysym men úshin mańyzdyraq bolyp tur. Alda talaı jospar, kóptegen maqsattar kútip tur. Sondyqtan meniń demalýǵa da, bir sátke tejelýge de ýaqytym joq», — deıdi Nadjıa. 

Sharafat Jylqybaeva