QR Investısıalar jáne damý mınıstri Jeńis Qasymbek Eýrazıa básekelestik baǵdarlamasynyń Dırektory Antonıo Sommamen kezdesti, - dep habarlaıdy Qamshy.kz.

6 qyrkúıekte Qazaqstan Respýblıkasy Investısıalar jáne damý mınıstrligi ǵımaratynda mınıstr Jeńis Qasymbek pen Eýrazıa básekelestik baǵdarlamasynyń Dırektory Antonıo Sommamen kezdesýi ótti

Aıta keterligi, Ekonomıkalyq yntymaqtastyq jáne damý uıymy Mınıstrliktiń birqatar salalary boıynsha áriptesi bolyp tabylady, al qazirgi tańda EYDU-nyń bıznes klımatty jaqsartý boıynsha kóptegen kepildemeleri qoldanystaǵy jáne ázirlenip jatqan zańnamalarda oryn tapqan.

Qazirgi tańda, mınıstrlik birqatar salalarǵa qatysty «Qazaqstannyń ınvestısıalyq klımatyna ekinshi sholý», «Qazaqstannyń taý-ken ónerkásibi básekelestigin arttyrý», «Qazaqstannyń salalyq básekelestigin arttyrý strategıasy» sıaqty jobalardy iske asyrýda. Atalǵan jobalardyń sátti iske asyrylýy EYDU-ǵa múshe memleketterdiń joǵary standarttaryna ótýge jol beredi.

Kezdesý barysynda EYDU ókilderi Mınıstrliktiń Investısıalar komıteti, Qurysh komıteti jáne Indýstrıa, ınovasıalar jáne kásipkerlik komıteti sıaqty EYDU-nyń salalyq organdaryna múshelik etý maqsatynda Qazaqstannyń atqaryp otyrǵan jumystaryn joǵary baǵalady jáne qoıylǵan maqsattarǵa qol jetkizýge jan-jaqty járdem kórsetýdi usyndy.

Kezdesý qorytyndylary boıynsha, J. Qasymbek básekelestikti arttyrý máselelerine jaýapty EYDU memleketteri damý mınıstrleriniń basyn qosatyn bıyl qarasha aıynda Parıj qalasynda ótetin «Eýrazıa Aptasy» atty jyl saıynǵy mańyzdy is-sharaǵa qatysýǵa shaqyryldy. Bul sharany el aýmaǵynda trıllıondaǵan teńgeniń mańyzdy jobalaryna basshylyq jasap otyrǵan mınıstrlik qyzmetiniń jańa bıikke kóterilýi dep baǵalaýǵa bolady.