Bıylǵy jyldyń 27 tamyzy men 4 qyrkúıegi aralyǵynda Máskeýde halyqaralyq áskerı-mýzykalyq festıvál ótti. Álemniń ár túkpirinen maıtalmandar jınalǵan án merekesinde Qazaqstan Respýblıkasy Memlekettik Kúzet Qyzmetiniń Prezıdenttik orkestri óner kórsetti, - dep habarlaıdy Qamshy.kz.
«Spasskaıa bashná» — memleket basshylarynyń qurmet qaraýyldary men úzdik dep tanylǵan áskerı shyǵarmashylyq ujymdardyń ónerin jurtshylyq nazaryna usynatyn halyqaralyq festıvál.
Atalmysh óner merekesine Memlekettik kúzet qyzmetiniń Qurmet qaraýyl rotasy jáne Prezıdent orkestri 2009 jyldan beri arnaıy qonaq retinde qatysyp keledi.
Plas-konsertte kóremenniń kózaıymyna aınalǵan Prezıdenttik orkestr solıseri Aıym Qoǵamova men Meırambek Qaraǵandy «2 Unlimited» tobynyń «No limit» ánin tamasha oryndap shyqty. Qazaq ánshileri áýeletken patrıottyq ánder, sap túzegen áskerı qyzmetshilerdiń qarýmen kúrdeli elementterdi kórsetýdegi sheberligine shet el jurtshylyǵy tań qalyp, reseılik kórermender súısine qol soqty. Qazaqstandyq ónerpazdar usynǵan kórsetilimniń birinshi bólimi "Igra prestolov" telehıkaıasynyń saýndtrek áýenimen súıemeldenip, Qurmet qaraýyl rotasynyń sarbazdary saltanatty marshty minsiz oryndap shyqty.
Prezıdenttik orkestrdiń solısi Álibek İzbasarovtyń oryndaýyndaǵy ánderdi de jurtshylyq ystyq yqylaspen qabyldady. «DjSmash» jáne «Vıntaj» tobynyń «Moskva» áni qazaqstandyq mýzykanttardyń máskeýlik kórermenderge jasaǵan erekshe tartýy retinde boldy.
Máskeý qalasynyń qala kúnine jáne "Kıno jylyna" arnalǵan merekelik shara aıasynda QR Prezıdenttik orkestri shahar saıabaqtarynda óner kórsetip, qala turǵyndarynyń qoshemetine bólendi.
Buǵan deıin «Spasskaıa bashná» festıvalinde jalpy sany 40 jýyq memlekettiń 140 mýzykalyq ujymdary óner kórsetipti. Bıyl toǵyzynshy ret uıymdastyrylyp otyrǵan festıválge Sıngapýr, Slovenıa, Avstrıa, Gresıa, Reseı, Mońǵolıa, Belarýs, Italıa, Izraıl, Japonıadan kelgen áskerı orkestrler qatysqan.
Aıym Qoǵamova, QR Prezıdenttik orkestriniń ánshisi:
— Festıvalden alǵan áserim erekshe. Buǵan deıin álemniń kóptegen memleketterinde qazaq ánderin shyrqap, óner kórsetken edim. Al áskerı ánder festıvaline qatysý men úshin úlken syn boldy. Shet eldik ónerpazdarmen kezdeskende olar qazaq óneri týraly kóp surady. Qazaqstanǵa kelip, ulttyq naqyshtaǵy konsertterdi óz kózderimen tamashalaǵysy keletinin aıtty. Birneshe tilde án aıtsam da qazaq ánderin shet el sahnasynda tamyljyta shyrqaýǵa kelgende ózime úlken synmen qaraımyn.
Sharafat Jylqybaeva
