Otbasy, otaǵasy, otanasy sıaqty sózderdiń barlyǵynyń túbiri ot sózinen, odan ary qazbalasaq Otannan bastalatyny túsinikti ǵoı. Nege adam balasy ómir boıy kindik qany tamǵan jerin, týǵan jerin ańsap, saǵynyp-sarǵaıyp ótedi. Onyń bári kishi Otanǵa qurmet, ata-babalardan ǵasyrlar boıy saqtalyp kele jatqan týǵan jerge degen eshqashan da sarqylmaıtyn saǵynysh.
Qaı zamanda da halqymyz otbasynyń amandyǵyna, onyń músheleriniń bir-birimen úzilmeıtin názik sezimdermen, tańǵy shyqtaı pák kóńilmen aralasyp-quralasyp, eshqashanda úlkenderdiń aldyn kespeı, kishilerge qurmetpen qarap tipti atyn atamaı syılaı bilgen-syılasa bilgen. Túsine bilgen adamǵa, qaınaǵalary men ata-enelerinen bastap, qaıyndary men qaıynsińlilerine de ártúrli at qoıyp erkeletip «Erkejan», «Myrzajigit»dep ataýy tamasha emespe? Al atasynyń balasy sanalatyn nemere-shóbereler she? «Áke kórgen oq jonar, sheshe kórgen ton pisher»–degen qaǵıdatpen jastarǵa, bolashaq otbasyn quratyndarǵa naǵyz úlgi-ónege kórsetýge turarlyq taptyrmaıtyn tájirıbe emes pe? Kebeje esimdi atasyn «tórtqulaq» - dep, jaǵy bir tynbaıtyn qaınysyn «taqyldaq» - dep ataǵan,ata-enesiniń balasy sanalǵandyqtan, tuńǵyshtarynyń atyn atamaı,
«Bóbek», «Áldı», «Alaqaı», «Sarbala» - depótken analarymyz aqyldyń da, durys naqyldyńda kózi. Keıbireýler onda turǵan ne bar deýi múmkin, biraq bizdiń eshkimge de uqsamaıtyn ulttyq ereksheligimiz ben salt-dástúrimizdiń tamyry tereńde.
Otbasyndaǵy otaǵasynyń orny óte úlken, onyń aıtqan árbir sózi buljumaı oryndalýǵa tıis buıryqtaı. «Ákeń jyndy bolsa baılap baq» degen sózdi beker aıtpaǵan atalarymyz.Sebebi, ol seniń ákeń ómirge keltirgen, ol qandaı adam bolsa da ony qandaı jaǵdaıda bolmasyn bala-shaǵasy tastamaı baǵýǵa mindetti. Ókinishke oraı qazirgi kezde ata-anasyn qarttar úıine aparyp tastaıtyndar bar ekeni ómirdiń ashshy shyndyǵy. Qansha jerden qarny toq bolǵanymen, kóńili toq emes, nemere-shóberelerin bir ıiskeýge zar bolyp otyrǵan qarttar qanshama?
Otbasylyq qundylyqtardy saqtaýdyń mańyzy zor. Elimizde halyq sanynyń ósýi otbasylardyń saqtalýymen, ulttyq negizde tárbıe berýdiń,
kóp balaly otbasylardyń úlgi tutýdyń arqasynda ǵana iske asatyny aıqyn. Sońǵy jyldary «Mereıli otbasy» baıqaýynda da kóp balaly, ósip-óngen, tamyryn tereńge jibergen, urpaqtar sabaqtastyǵy jarasymdy jalǵasqan otbasylardyń jeńiske jetip jatýy osyǵan dálel.
Otbasyn nyǵaıtý men dástúrlerdi saqtaý memlekettiligimizdi damytýdyń kepili. Sondyqtan da biz otbasynyń mereıin barynsha ústem ete berýimiz kerek.
Baıǵalı Ábdáliuly,
«Nur Otan» partıasy Bostandyq
aýdandyq fılıalynyń keńesshisi.
