Depýtattardyń qylyqtaryna kúlkim keledi. Parlamentke alǵash saılanyp kelgende olar ózderin keremet tulǵaǵa aınalǵandaı sezinip, shikireıip, bes qap bop júredi. Parlamentte resmı tirkelgen 400-den astam BAQ ókili, jýrnalıser bar. Kezekti otyrystan soń Májilis zalynan shyǵa kelgende qaptaǵan jýrnalıs mıkrofon usynyp, kameralary men fotoaparattary sartyldap, sınhron, suhbat alýǵa daıar turady. Jańadan depýtat bolǵandar alǵashynda olarǵa kóz qyryn da salmaıdy. Birli-jarym saýal tastasa, «ýaqytym joq» dep óp-ótirik mańǵazdana qalady, birdeme tyndyryp tastaǵandaı. 

Alaıda, olardyń mundaı tirlikteri alysqa barmaıdy. Keıin jýrnalıser de olarǵa qyryn qarap, eselerin ábden qaıtarady. Parlament jumysy qyza túsip, birshama ýaqyt ótkennen keıin álgi bes qap bolyp júrgender jýasyp qalady. Ondaı depýtattar zaldan shyǵa salyp, jaýtań-jaýtań qaǵyp, BAQ ókilderine qaraǵyshtap, júrisin baıaýlatyp bara jatqanyn kóresiń. Ásirese, «Qazaqstan» ulttyq arnasy, «Habar» agenttigi, «Egemen Qazastan», «Zań gazeti», «Aıqynnyń» tilshileriniń qasynan ótkende jalynyshty keıippen úmittene kóz tastaıdy. Óz kezeginde, endi, jýrnalıser olardy pysqyrmaı qoıady. Sebebi, ondaı depýtattardyń aıtar eshteńesi joq ekenin otyrystardan baıqap bilip alǵan. Otyrystarda jóni túzý pikir aıtpaǵan, úkimetke batyl túrde saýal joldamaǵan depýtattarǵa úıindegi qatyn, bala-shaǵasy da maza bermeıtin bolsa kerek. «Pálen degen depýtatty teledıdardan kúnde kórsetedi. Al, sen joqsyń, kórinbeısiń» degendeı. 

Negizi, halyqqa jaǵý úshin áý bastan BAQ-qa jaqyn bolýdy, depýtat degen JOǴARY LAÝAZYMDYQ MÁNSAP EMES, «kóptiń biri, birdemeniń kiri» ekenin der kezinde túsinbegen depýtat osylaısha «saıası ólik» bolyp sesıany qalaı bastasa, aqyry sol kúıi aıaqtaıdy.

Qýandyq Shamahaıulynyń Feısbýktegi paraqshasynan alyndy