Memleket basshysynyń jarlyǵymen Imanǵalı Tasmaǵambetov QR premer-mınıstriniń orynbasary bolyp taǵaıyndalǵan bolatyn. Elbasy Qorǵanys mınıstrligi ujymymen kezdesýde osy taǵaıyndaýǵa qatysty oıyn bildirdi, - dep habarlaıdy Qamshy.kz.

Kezdesý barysynda Nursultan Nazarbaev Sáken Jasuzaqovtyń Qorǵanys mınıstri laýazymyna taǵaıyndalǵany týraly aıtyp, qazirgi syn-qaterlerdiń aldyn alý jáne ony joıý isindegi áskerdiń aıryqsha rólin atap ótti.

– Kelesi jyly Qazaqstan Qarýly Kúshteriniń qurylǵanyna 25 jyl tolady, bul elimizdiń tarıhyndaǵy mańyzdy beles bolyp sanalady. Ásker – egemendiktiń basty kepili. Óńirde jáne álemde qalyptasqan qazirgideı kúrdeli kezeńde Qarýly Kúshterdiń róli artyp keledi. Halyqaralyq terorızmniń qaýip-qaterleri, gıbrıdti soǵystar, beleń alyp kele jatqan qarýlaný básekesi ulttyq qaýipsizdik máselelerine basa kóńil bólýge májbúrlep otyr, – dedi Qazaqstan Prezıdenti.

Elbasy aıryqsha nazar aýdarýdy qajet etetin birqatar basym baǵytty atap ótti.

«Áskerı tártipti jetildirý, áskerı qyzmetshilerdi áleýmettik qamsyzdandyrý jáne Qazaqstan áskeriniń jaýyngerlik daıarlyǵyn joǵary deńgeıde ustaý jónindegi jumystardy jalǵastyrý qajet. Qarýly Kúshterdi zamanaýı qarý-jaraqpen jáne tehnıkamen jaraqtandyra otyryp, áskerı daıyndyq máselelerin odan da sapaly deńgeıge jetkizý kerek. Ol úshin barlyq qajetti qarajat bólinetin bolady. Biz ózimizdiń damyǵan áskerı-tehnıkalyq ónerkásibimizdi qalyptastyrýǵa tıispiz. Osyǵan baılanysty, tıisti qurylymdy arnaıy korporasıaǵa nemese áskerı-ónerkásiptik keshen jónindegi mınıstrlikke aınaldyrý máselesi qarastyrylatyn bolady», – dedi Memleket basshysy.

Nursultan Nazarbaev taǵy bir mańyzdy másele áskerı qyzmetshilerdiń jańa býynyn qalyptastyrý ekenin aıtty.

«Sol úshin tıisti oqý oryndary, ýnıversıtetter ashyldy. Endi áskerı qyzmetshilerdi daıarlaý sapasyn arttyrýmen aınalysý kerek, – dedi Qazaqstan Prezıdenti.

Jańa Qorǵanys mınıstri S.Jasuzaqovty tanystyrǵan Memleket basshysy  onyń mol tájirıbesi men kásibı mashyǵy bar ekenin atap ótti.

Sondaı-aq Nursultan Nazarbaev I.Tasmaǵambetovke atqarǵan jumysy úshin rızashylyq bildirip, eldiń Premer-Mınıstriniń orynbasary laýazymyna taǵaıyndalýymen quttyqtady.

«Imanǵalı Nurǵalıuly Tasmaǵambetov meniń aıtqan tapsyrmalarymdy jaqsy oryndady. Meniń jarlyǵym boıynsha premer-mınıstrdiń orynbasary qyzmetine keldi. Ol osy qyzmette de ádil bolatynyna jáne berilgen tapsyrmalardy tolyqtaı oryndaıtynyna senemin. Imanǵalı Tasmaǵambetovqa mınıstrlikte atqarǵan jumysy úshin alǵys aıtamyn, tek sáttilik tileımin», - dedi Nursultan Nazarbaev.

Sońynda Qazaqstan Prezıdenti qatysýshylarǵa eldiń qorǵanys qabiletin nyǵaıtý, Qazaqstan armıasynyń jaýyngerlik daıarlyǵyn arttyrý isinde tabys tiledi.