Gýrbangýly Berdymýhamedov eldiń negizgi zańyna eki ózgertý engizý arqyly Prezıdent taǵynda máńgilik otyrýǵa múmkindik aldy. Jýyrda Túrikmenstanda jańa Ata zań kúshine endi. Soǵan saı qazirgi el basshysy Gýrbangýly Berdymýhamedov halqyn máńgilik basqaratyn boldy. Sońǵy ret bul elde Prezıdent saılaýy 2012 jyly ótken. Al kelesi saılaý 2017 jylǵa josparlanǵan. 

Buǵan deıingi zań boıynsha el Prezıdenti bolyp jasy 70-ke tolmaǵan adam saılana alatyn. Berdymýhamedov jasqa shekteýdi alyp tastady. Onyń jasy qazir 59-da. Zańǵa engizilgen ekinshi ózgeris Prezıdent ókilettigin bes jyldan jeti jylǵa uzartý.  

Bul ózgertýdi Túrikmenstan Parlamenti bir aýyzdan qabyldady. Daýys berý Prezıdenttiń qaramaǵyndaǵy Aqsaqaldar keńesinde ótken. Osy otyrysta Berdymýhamedov zańǵa qol qoıdy. 

"Rabıo Svoboda"-ǵa sensek, Túrikmenstan basshysynyń 12 jasar nemeresin muragerlikke daıyndap jatqany týraly aqparattar taraǵan kórinedi. Foreign Policy jýrnaly Túrikmenstan Prezıdentin jahandaǵy eń nashar 23 dıktatordyń tiziminde besinshi orynǵa qoıǵan. 

Atalmysh aqparat kózi Gýrbangýly Berdymýhamedovtyń sońǵy júz jylda bolmaǵan bıleýshi dınastıa qurýdy uıǵarǵanyn jazady. Onyń 12 jasar nemeresi Kerımgýly jurttyń nazaryna ilikken jasóspirim. Byltyr Ashhabadta Ahalteke sáıgúlikteriniń báıgesi bolypty. Osy jarysta Kerımgýly Berdymýhamedov bárin basyp ozyp, márege 1 mınýtý 18,4 sekýndta jetip, jurtty tań qaldyrypty.  Báıge aıaqtalǵanda áýede ushaqtar qalyqtaǵan. Kerımgýlynyń atasynyń ózi bos ýaqytyn at sportyna arnaıdy eken.  

Bul bala sońǵy úsh-tórt jylda el basshysymen birge alqaly jıyndarǵa qatysyp, tipti saılaý ýchaskelerine de barady. "Hronıka Týrkmenıstana" ınternet basylymynyń bas redaktory Farıd Týhbatýllınnyń aıtýynsha, Berdymýhamedovtyń Serdar esimdi bir uly men eki qyzy bar. Kerımgýly Berdymýhamedov — Prezıdenttiń bes nemeresiniń úlkeni. 

Dana Qamshybek