«Qazirgi kezeńdegi ekstremızm men terorızmniń jolyn kesý men aldyn alýdyń zańnamalyq jáne ınstıtýsıonaldyq sharalary» taqyrybynda ótken dóńgelek ústelge qatysqan saıasatker Muhtar Taıjan quzyrly organ basshylaryna osyndaı saýal tastady, - dep habarlaıdy Qamshy.kz.

Ekstremızm, terorızmmen kúres máselelerin talqylaǵan jıynda saıasatker jastardyń teris aǵymdar jeteginde ketýiniń basty sebepteri retinde kedeıshilik pen memlekettik saıasattaǵy ádiletsizdikti atady.

«Lańkestiktiń basty negizi – kedeıshilik pen jumyssyzdyq. Terorızmmen kúreste Úkimet basshylarynyń jaýapkershiligi zor. Elde kedeıshilik bolmaýy kerek. Óıtkeni, elimiz – baı. Qazaqstanda bar-joǵy 17 mıllıon ǵana adam bar. Sondyqtan, biz dúnıe júzindegi ahýaldyń ózgerýine baılanysty Úkimetten basqa ekonomıkalyq saıasat kútemiz», - dedi M. Taıjan.

Jastardyń ekstremıstik ıdeıalarǵa erýine bilim berý júıesindegi kemshilikterdiń, qoǵamdaǵy ádiletsizdiktiń de sebep bolyp otyrǵanyna nazar aýdartty.

Sondaı-aq, M. Taıjan jer reformasyna narazylyq bildirip, aksıalar uıymdastyrǵan belsendilerdi qýdalaý máselesine de toqtaldy.

«Jańa Záýresh Battalova hanym durys aıtyp ketti. Mysaly, Maks Boqaev pen Talǵat Aıannyń tórt aı qamaýda otyrǵany durys emes dep oılaımyn. Óıtkeni, áli sot úkimi joq. Olardy úı qamaqqa aýystyrýǵa bolady ǵoı. Mysaly, úlken jemqorlyqqa barǵan «EKSPO» basshylary sot sheshimin úılerinde kútti, al, bul jigitter nege sotty úıde otyryp kútpeıdi?», - degen M. Taıjan belsendiler sottalyp ketse, ol sheshim eshkimge abyroı ákelmeıtinin, memleket raqymshylyq tanytýy kerektigin eske saldy.