Kesheli beri el nazary Almaty oblysy Jambyl aýdany jaqqa aýdy. Osy aýdannyń ortalyǵy Uzynaǵash kentine SHQO-dan mal ákep satpaq bolǵan úsh birdeı azamat ótken jeksenbide eki júk kóligine tıelgen 40 bas iri qara malymen joǵaldy. Týystary dabyl qaǵyp, bir aptaǵa jýyq ýaqytqa sozylǵan izdeý jumystaryna polısıadan bólek, joǵalǵan jigitterdiń týystary, dostary, eriktiler de jumyldyryldy.
Ókinishke oraı, búgin polısıa joǵalǵan úsh jigittiń de qaza bolǵanyn, qylmysqa qatysy bar degen kúdikpen eki azamattyń tutqyndalǵanyn habarlady. Onyń ózin polısıa basshylyǵy marqumdardyń týystaryna ǵana aıtqan.
Jalpy osy bir apta ýaqyt ishinde ne Jambyl aýdandyq, ne Almaty oblystyq İİD tarapynan aqparat quraldaryna, osy oqıǵaǵa alańdaýshylyq bildirgen jalpy jurtshylyqqa resmı túsinikteme bergen jan bolmady. «Qamshy», Baq.kz bastaǵan birneshe aqparattyq saıt, 31-arna, KTK telearnalarynyń jýrnalıseri resmı málimetti kimnen alaryn bilmeı dal boldy. Bul jaǵdaı memlekettik uıymdardyń qoǵamdyq rezonans týǵyzǵan oqıǵalarǵa qatysty shuǵyl aqparattyq jumys júrgizýge qabiletsiz ekenin kórsetip otyr.
Sonymen ótken jeksenbide joǵalǵan úsh azamattyń qaza bolǵanyn bildik. Tergeý júrip jatyr eken. Eki kúdikti tutqyndalypty. Oǵan qatysty da osy oqıǵanyń basy-qasynda júrgen azamattardyń kúdigi kóp sıaqty. Sondyqtan da, polısıa, basqa da memlekettik organdar eldi qulaqtandyrý, teris aqparattardyń taralýyna tosqaýyl bolý jaıyn oılaýy kerek.
Endi negizgi máselege kóshsek, bul jaǵdaı tek bir aýdannyń ne oblystyń sheńberinde qalatyn oqıǵa emes. Zardap shegýshi taraptyń atamekenge kelgen qandastarymyz ekenin eskersek, bul oqıǵa qoǵamda áleýmettik ádildik turǵysynan belgili bir deńgeıde teris kózqaras týǵyzýy múmkin. Onyń ústine, úsh azamat mal ákelgen Uzynaǵash bazarynda alaıaqtyq pen bopsalaý syndy qylmystar buǵan deıin de bolǵanyn, tipti, bazardy kisi tonaýdy kásipke aınaldyrǵan toptar da joq emestigin aıtyp júrgender bar. Sondyqtan da, birneshe aqparat quralynda jarıalanǵan osy oqıǵaǵa qatysty oblys basshysy Amandyq Ǵabbasuly da el aldyna shyǵyp, kópke basý aıtýy, tıisti mekemelerdiń jumysyn qatań baqylaýǵa alýy kerek sıaqty.
