Uzynaǵash bazarynda mal satyp júrip iz-túzsiz joǵalyp, sońynda qylmyskerler qolynan jazym bolǵan úsh jigittiń ólimi osy áýlette oryn alǵan jalǵyz qylmys emes. Qaıtys bolǵan jigitterdiń biri Muqıat Zarlyhannyń aǵasynyń úıinde byltyr da iri tonaý qylmysy oryn alǵan, alaıda oǵan kináliler sol kúıi tabylmaǵan, - dep habarlaıdy Qamshy.kz Baq.kz – ke silteme jasap.

Qaza tapqan úsh jigittiń biri Muqıat Zarlyhannyń týǵan aǵasy Adal Zarlyhannyń úıinde tonaý qylmysy byltyr da bolǵan eken. İnisimen qosa ózi de mal saýdasymen aınalysatyn Adal Zarlyhan bul oqıǵa týraly bizge búgin ózi aıtyp berdi.

2015 jyly 9 mamyr kúni túngi 02:30 shamasynda onyń úıine otaǵasy joq oraıdy paıdalanyp, betin búrkegen qarýly 3 adam basyp kirgen. Áıel, bala-shaǵasyn baılap tastap, 1 mıllıon teńge aqshasy men úıdegi ózge de áshekeı buıymdaryn túgin qaldyrmaı tonap ketken.

Adaldyń aıtýynsha, sózderine oryssha aralastyryp sóılep, dármensiz bala-shaǵaǵa qarýmen qaýip tóndirgen qylmyskerlerdiń isimen Almaty oblysy Kóksý aýdandyq ishki ister bólimi aınalysypty. Bul jaǵdaıdan qatty qoryqqan onyń áıeli men 9 jasar qyzy emhanaǵa jatyp, zorǵa saýyqqan eken.

Aıta keterligi, bul otbasyǵa qarýly shabýyl jasaǵan qanypezerler áli kúnge ustalmapty.

Buǵan deıin habarlaǵanymyzdaı, Uzynaǵashta joǵalǵan úsh jigitti óltirgen kúdiktilerdiń esimi belgili boldy.

Oqıǵanyń tolyq hronologıasyn myna jerden oqı alasyz.

Sondaı-aq, atalmysh qylmystyq oqıǵaǵa burynǵy polısıa qyzmetkeriniń qatysy bar bolýy múmkin degen málimettermen bólisti qaıtys bolǵan jigitterdiń týǵan-týystary. Ázirge, bul jaıynda ishki ister organdary resmı túsinikteme bergen joq.