Úkimet jıynynda İshki ister mınıstri Qalmuhanbet Qasymov Almaty oblysy Jambyl aýdanyndaǵy qandy oqıǵa týraly aıtyp berdi, - dep habarlaıdy Qamshy.kz.
«20 qyrkúıek kúni bizge Almatyda mal satýǵa ketip, joǵalǵan azamattar týraly aryz tústi. Eki kólikpen olar 41 bas iri qarany Almaty oblysyndaǵy bazarǵa alyp barǵan. 21 qyrkúıekte bir kólik, 23-i kúni ekinshisi tabyldy. Keıin jergilikti turǵyndardyń osy kólik júrgizýshilerine kómekteskeni, olardyń kóligi balshyqqa batyp qalǵany anyqtaldy, sol turǵyndar arqyly eki kúdiktini taptyq», - dedi İİM Q. Qasymov.
Mınıstrdiń aıtýynsha, qylmyskerler ol úsh azamatty aldap, alyp ketken.
«Shatqalǵa aparyp, olar úsh kisini de óltirgen. Mal men máıitterdi kólikpen alyp bara jatqanda kólikteri batyp qalǵan. Sosyn jergilikti turǵyndardan kómek suraǵan. Qazir qylmyskerler tutqyndaldy, qylmys jasalǵan qarý tárkilendi, qylmyskerler qylmys orny men máıitter kómilgen jerdi óz erikterimen kórsetti. Barlyq qajet saraptama taǵaıyndaldy. Búgin qaza bolǵan azamattardyń jerleý rásimi ótedi. 36 bas mal tárkilendi. İsti Almaty oblystyq İİD baqylaýǵa aldy. Men jaqyn kúnderi tergeý aıaqtalyp, is sotqa beriledi dep oılaımyn», - deıdi mınıstr.
Mınıstrdiń baıandamasyn tyńdaǵan premer-mınıstr Baqytjan Saǵyntaev Q. Qasymovqa istiń barysyn baqylaýǵa alýdy tapsyrdy jáne Úkimettiń kelesi otyrysy qoǵamdyq qaýipsizdik jáne ozbyrlyqpen kúreske arnalatynyn aıtty.
«Baqylaýǵa alyńyz. Qoǵamdyq qaýipsizdik, ozbyrlyqpen kúres bizdiń jumystyń basty baǵyty ekenin bárimiz bilemiz. Sondyqtan kelesi jaqynda osy máseleni úkimet jıynynda qaraý kerek dep oılaımyn», - dedi B. Saǵyntaev.
Esterińizge salsaq, Almaty oblysy Jambyl aýdanynda úsh azamat joǵalyp, olardyń keıin kisi qolynan qaza bolǵany habarlanǵan bolatyn.
Búgin Almaty oblysy Kóksý aýdanynda marqumdardyń jerleý rásimi ótýde. Marqumdardyń artynda segiz bala jetim qaldy.
Esterińizge salsaq, Qamshy.kz portaly İİM Q. Qasymovtyń atyna atalǵan isti qatań baqylaýǵa alyp, tergeýdiń barysy týraly qoǵamdy qulaqtandyrýdy surap hat jazǵan bolatyn.
