Almaty oblysynda dúıim jurtty shýlatqan, úsh birdeı azamatty jaýyzdyqpen óltirip, malyn oljalady degen kúdiktiler jaıly ázirge tolyq aqparat aıtylmady. Tek olardyń turǵylyqty jeri men aty-jónderi belgili. Al olardyń buǵan deıin nemen aınalysyp, qalaı tirshilik etkenderi de kópshilikke beımálim, - dep habarlaıdy Qamshy.kz 31-arnaǵa silteme jasap.
Burynǵy Amangeldi sovhozy, qazirgi Suranshy batyr aýyly búginde tomaǵa-tuıyq. Kóshede beısaýat júrgen adam joq, sózge sarań, eshkim suhbat ta bermeıdi. Aýyldastarynyń áreketi eldi shoshytqan syńaıly. Surastyra júrip kúdikti Talǵattyń úıin taptyq. 45 jastaǵy azamat kóp jyldan beri kólik jóndep kúneltken eken. Sońǵy kezderi eptep mal saýdasymen aınalysypty. Úsh balanyń ákesi. Týǵan-týystary eńbekqor Talǵattyń qandy oqıǵaǵa qatysy baryna senbeıdi. Biraq eshbiri suhbat berip, ashylyp sóılespedi. Al bul kisi ekinshi kúdikti Murat Ońalbaevtyń sheshesi. Baıqus ana balam áldekimderdiń arbaýyna túsip qaldy dep shyryldap otyr.
Murattyń anasy:
Sol kúni, bazar kúni KazSıkte bir jigittiń ólimine áıelimen bárimiz baryp kele jatqanymyzda telefony shyryldady. Bireý shaqyrdy, 1-men 2-niń ortasy ne 2 men 3-tiń ortasy. Men bazardan mal alyp kele jatyr edim kamazben, úıimniń janyna kelip túsirisip jibershi dedi. Aýyldyń balasy, aǵaıyn adambyz, sosyn balam jaraıdy dedi. Bizdi túsirip soǵan bardy, arty osy boldy. Odan ary qaraı ne bolǵanyn, qalaı bolǵanyn bilmeımin.
41jastaǵy Murat Ońalbaev - úshinshi toptaǵy múgedek eken. Bir kózi kemtar. Onyń da úsh balasy bar. Buǵan deıin qylmystyq jaýapqa tartylmaǵan. Kóligimen adam tasyp kúneltken.
Murattyń anasy:
- Tek adam óltiredi degenge senbeıim. Altyn kórip perishte joldan taıyp, saǵan da birdeńe beremiz dese soǵan ilesip ketti ma? Qaıdan bileıin. Ol tek erýshi.
Eldi dúr silkindirgen qandy oqıǵa búginde jiti tekserilip jatyr. Alaıda, marqum Muqıat Zarylhannyń týǵan aǵasy Adal Zarylhan tepse temir úzetin úsh jigitti eki adam óltirdi degenge senbeıdi.
ADAL ZARYLHAN, Muqıat marqumnyń aǵasy:
- Mashına dúısenbi kúni, 19 kúni órtengen. Keshki saǵat 9 dan 40 ótkende. Ana jerdegi malshylar Uzynaǵashtyń ROVD-syna zvondaǵan. Sonda olar nege qýzamaıdy? Ertesinde tań atpaı halyq shyǵarady. Bir-aq adam kóredi. Basqa adam kórmeıdi. Ýchaskovyıy qaıda ol aýyldyń. Ony nege jalǵyz adam kóredi. Maǵan ǵana nege telefon soǵady. Ony nege bir aýdan kórmeıdi
Jalpy mal baqqan sharýalar men et satqan saýdagerlerdi tonaý, óltirý sekildi qylmystar Almaty aımaǵynda jıi bolady. Almatylyq malshylar men saýdagerlerge birneshe márte shabýyl da jasaldy. Sondyqtan bazar jaǵalaǵan uıymdasqan qylmystyq top bolýy múmkin degen áńgime búginde el ishinde jeldeı esip júr. Qolǵa túsken eki kúdiktiniń de jaqyndary osy ustanymda. Olar Qaırat pen Talǵat áldekimniń aldaýyna túsip, arandap qaldy. Shelek jalaǵandar tutylyp, aıran ishkender qutylyp ketpese dep alańdaıdy.
