Qordaǵy trıllıondar tekke ketip jatqan joq! Ulttyq bank tóraǵasy Birińǵaı zeınetaqy qoryndaǵy aqsha úshin azamattarǵa   esh alańdamaýǵa keńes berdi. Danıar Aqyshevtyń aıtýynsha, jurttyń «qartaıǵanda qajet bolady» dep jıǵan teńgeleri Úkimet senim artqan bankter men iri jobalardy qarjylandyrýǵa jumsalýda, - dep habarlaıdy Qamshy.kz KTK arnasyna silteme jasap.

Danıar Aqyshev, Ulttyq bank tóraǵasy:

-Birińǵaı zeınetaqy qoryndaǵy ár tıynǵa memleket tikeleı jaýap beredi. Bul talap zańda da jazylǵan. Sondyqtan, qobaljýǵa esh negiz joq.

Sondaı-aq, Bas bankır qordaǵy qarjynyń qaıda bólingenin jáne odan túsken paıda týraly aqparatty turaqty jarıalaımyz dep sendirip otyr. Buǵan deıin prezıdent zeınetaqy qoryndaǵy trıllıondardy ekinshi deńgeıli bankterge berip, shaǵyn jáne orta bıznesti nesıelendirýdi tapsyrǵan edi. Al qalǵanyn shetelden qundy qaǵaz satyp alýǵa, aýyl sharýashylyǵy salasyna arnalǵan óndiris oryndaryn ashýǵa jumsalýy tıis bolatyn. Biraq, Aqyshevtyń aıtýynsha, elimizdegi ekinshi deńgeıli bankter zeınetaqy qoryndaǵy qarjyǵa asa qumartyp otyrǵan joq. 15 bank nebary 112 mıllıard surapty. Esesine, qordyń 15 mıllıard teńgesi «EKSPO» kórmesi aýmaǵynan turǵyn úıler men saýda ortalyqtaryn turǵyzýǵa jumsalmaqshy.