Almaty oblysynda mal saýdasymen aınalysqan úsh aǵaıyndynyń ólimine bazarda urylardyń qaptaýy sebep! Qandyqol qylmystan keıin saýdaǵa shyǵýǵa júregi shaılyǵyp qalǵan saýdagerler osylaı dep otyr. Olar Uzynaǵashtaǵy mal bazaryn urylardyń burynnan jaǵalap júrgenin aıtady. Sýyq qoldylardyń qunyqqany sonsha, tórt túlikten túsken qyrýar qarjyny árbir saýda saıyn qaǵyp ákete beredi eken. Al sońǵy ret qaraqshylardyń maldy ıesimen qosa urlap ketkeni málim, - dep habarlaıdy Qamshy.kz KTK arnasyna silteme jasap.
Máıiti taýda tabylǵan úsh aǵaıyndy – Jarqynbek, Qadilbek jáne Muqıat sońǵy ret osy bazardan ketken. Qazir munda mal saýdagerleriniń iri qaramen kelýge júrekteri shaılyǵyp qalǵan. Óıtkeni urylar tym erkinsinip ketipti. Sebebi, sol aǵaıyndylar joǵalar kúni munda taǵy 15 tuıaq urlanǵan.
Kárimhan Nábı, saýdager:
- Osyǵan qaraqshylardyń qatysy bar degen kúdigimiz bar.
Aǵaıyndylarmen birge mal saýdasymen aınalysqandar munda ár bazar bolǵan saıyn ury-qary qaryq bolyp qaıtady deıdi. Onda da mıllondap oljalaıdy eken. Máselen, Esbolat Maǵazdyń qaraqshylar bir aı buryn baqandaı 4 mıllıon teńgesin bazar ishinde qaǵyp ketken.
Esbolat Maǵaz, saýdager:
-Osy bazardyń ishinde onshaqty adambar.Saýdagerlerdi ańdyp, aqsha urlaıdy. Bul ótken jyldan bastalǵan.
Ózderiniń aıtýynsha, Uzynaǵashtaǵy mal bazarynda aqshasyn urlatpaǵan adam joq eken. Polısıaǵa shaǵymdanǵanymen, birde-birin taýyp bermegen. Aqyry qolyn bir siltep, aryz jazýdy da qoıypty.
Ádil Qyzyruly, saýdager:
- Byltyr kúzde 840 myń teńge aqsha joǵaldy mashınadan.
Saıahat Saltanatuly, saýdager:
- Maldy satyp 870 myńdy aldyn-ala tólem retinde alǵanbyz. Qalǵanyn keıinnen alatyn boldyq. Osy aqshany týra qaltamyzdan qaǵyp ketti.
Soraqysy sol, bul oqıǵalardyń biri de kameraǵa túspegen.
Qyryq bas sıyrmen joǵalyp, artynsha óligi tabylǵan úsh birdeı arystaı azamat Jarqynbek, Qadilbek, Muqıat sońǵy ret mine osynda saýda jasap turypty. Sońǵy ret ol kisilerdi kýágerler senbi kúni tańǵy segizde kórgen, al kúndizgi saǵat 11-lerde sıyrlar tıelgen júk kóligi bazardan syrtqa shyǵyp ketken. Biraq ókinishke qaraı bazar aýzynda turǵan 6 birdeı kameraǵa ol úsh azamat ta olardyń sıyrlary da, olardy alyp ketken kúdiktilerdiń biri de túspepti.
Kameraǵa túspegenimen, kúdiktilerdiń biri – Talǵat degendi saýdagerler tanyp qoıypty.
Esbolat Maǵaz, saýdager:
-Talǵat degen jigitti ózi «ury» dep aıtady. İnisi otyryp kelgen 15-16 jyl.
Aǵaıyndylardyń óliminen keıinde mal bazarynda saqtyq sharalary kúsheıtilmepti.
Erkin Jumabaev, bazar kúzetshisi:
-Ózderi jaýap beredi ǵoı.
-Kim ózderi?
– Kelgen adam óziniń múlkine malyna ıe bolady. Oǵan jaýap bere almaımyz biz.
Osylaı dep kúlgen kúzet iri qara satatyndardyń qaýipsizdigine jaýap bermeımiz dep otyr. Esesine, árbir mal basyna, ony alyp kelgen kólikke de 700 teńgeden salyq jınalady eken.
