Gaz balony men qutyǵa benzın quıyp alyp dalaǵa shyqqan turǵyndar týra polıseılerdiń kózinshe, ústerine órt qoımaqshy boldy. Ashýly jurt tipti oqıǵa ornyna jetken sheneýniktermen tóbelesýge shaq qaldy. Halyqtyń bar kinási – Elordada jańadan salynyp jatqan temirjol vokzalyna jaqyn turýy. Óıtkeni, Astana ákimdigi vokzaldyń kórkin ketirip turǵan 40-qa tarta jer úıdi qıratyp, ornyna záýlim ǵımarat pen jol salmaqshy, - dep habarlaıdy Qamshy.kz KTK-ǵa silteme jasap.
Astanada jyldam salynyp jatqan jańa vokzalǵa kórshiles saıajaı turǵyndary sheneýnikterdi seskendirý úshin ábden daıyndalypty. Áıelder kanıstr, plasık bótelkege benzın quıyp kóterip júr. Er-azamattar bolsa, úıdegi paıdalanyp otyrǵan gaz balonyn dalaǵa shyǵaryp alǵan. Sóıtip, ózderin jaryp jibermek. Al qaptaǵan polıseıler narazy topty qyzyl lentamen qorshap qoıyp, aınalany kúzetip tur.
Sot bul azamattardyń qala ishindegi saıajaıǵa salyp alǵan baspanalary súrilsin degen sheshim shyǵarǵan. Biraq, jurt úırenip qalǵan úılerin ońaılyqpen bosatyp bergisi joq. Ornyna páter surap otyr.
Jańabek Sýanbekov, Astana qalasynyń turǵyny:
-Men jarylamyn, ólemin, basqa ne isteımin? Qaıda baramyn? Barar jer, basar taýym joq. Aqshasy kerek joq, páter bersin. Jaryqty qıamyz ketińder dep jatyr.
Negizi, bul saıajaıdaǵy 40-qa jýyq úı súrilýi tıis. Jartysyna 2 mıllıonnan 8 mıllıon teńgege deıin aqshalaı ótemaqy tólengen, al qalǵandaryna Astanadan 5 shaqyrym jerdegi Aleksandrovka eldi mekeninen jer telimderin usynǵan. Turǵyndar kún sýyp ketkendikten ol ýchaskelerge úı salyp úlgermeımiz dep otyr. Ári ortalyqtan alystaǵysy da kelmeıdi.
Erlan Esenov, Astana qalasynyń turǵyny:
-Bilgenderin istep jatyr. Bireýine «kósh» al ekinshilerin qalasyń depti. Ne alalaý bul?
Ózderin órtemekke bel býǵandardyń qasyna ákimdiktegiler de shuǵyl jetti. «Qalalyq jyljymaıtyn múlik» komýnaldyq kásipornynyń basshysy ashýly turǵyndardy basýdyń ornyna, kelinshektermen salǵylasyp, odan saıyn yzalandyrdy.
-Aýzyńdy jaba turshy.
-Meniń bir jyl boıy aýzyma qaqpaq bolyp kelesiń .
-Uıatsyzsyń sen.
-Óziń uıatsyz.
Osylaısha, sheneýnik áıeldermen ábden aıtysyp bolǵan soń, úıleri súrilgenderge ákimdik tarapynan jasalǵan sharalardy tizip, aqtalýǵa kiristi.
Aleksandr Strochkov, «Qalalyq jyljymaıtyn múlik» MKK basshysy:
-Bul memlekettiń menshigindegi jer. Negizi turǵyndardyń salyp alǵan úılerine ǵana ótemaqy beriledi. Al olar 10 mıllıon teńgeden talap etip otyr. Ýchaske bóldik, barǵylary joq.
Úılerdiń jappaı súrilýine – bul mańnan temirjol vokzalynyń salynýy sebep. Kelesi jyly jazda «EKSPO» qarsańynda qurylysyn bitirý kerek bolǵandyqtan bunda qyzý jantalas. Turǵyndardyń kúni erteń naǵyz ortalyqqa aınalatyn bul mańnan ketkisi kelmeıtini túsinikti. Al qıratylǵan baspanalardyń ornyna kópqabatty záýlim ǵımarattar men birneshe jolaqty asfált tóselmek. Biraq, ótemaqyǵa da, bólingen jer telimine de kóńili tolmaǵan jurttyń ólispeı beriskisi joq.
Astanadaǵy baspana daýy munymen shektelmeıtin syndy. Óıtkeni, Elordada áli 16 myńnan astam saıajaı súrilmek. Qıratylǵan úılerdiń ornyna kópqabatty nysandar, myń jyldyq aleıasy, gaz qurylǵylaryn shyǵaratyn zaýyt salynady. Al baspanalary súrilgenderge páter berilmeıdi, tek basqa aýdandardan jer telimi qarastyrylǵan.
