Pavlodarlyq kelinshek Olesá Pýshkınanyń júregimen ómir súrip jatqan Almaty oblysynyń turǵyny ózine ómir syılaǵan jannyń týǵandaryna alǵys aıtyp, vıdeoúndeý jasady, - dep habarlaıdy Qamshy.kz Tengrinews.kz – ke silteme jasap.

Vıdeoúndeý avtory týǵan qyzynyń júregin ózine bergen Nadejda Belaıa men Olesányń artynda qalǵan qyzy Arınaǵa alǵys bildirdi.

«Nadejda, Sizdiń qyzyńyz Olesá qashan da meniń keýdemde ómir súredi. Sizder maǵan ómir syıladyńyzdar. Men qansha ómir súretinimdi bilmeımin, biraq, men ony ómir boıy qasterlep ótem. Árqashan da qyzdaryńyz tiri dep oılańyzdar», - deıdi ol.

Atyn elge tanytýdan bas tartqan Almaty oblysynyń turǵynyna osy jyldyń aqpan aıynda operasıa jasalyp, mıdyń gemorragıalyq ınsýltynan kóz jumǵan 37 jastaǵy Olesá Pýshkınanyń júregi qondyrylǵan. O. Pýshkınanyń artynda 18 jasar qyzy qalǵan. Operasıa sátti aıaqtalyp, aýyr naýqasqa shaldyqqan azamat aıaqqa turǵan.

Elimizde mundaı sıpattaǵy donorlyq kómek bir bul emestigin esterińizge salamyz. Qyrkúıek aıynda 20 jastaǵy taǵy bir pavlodarlyq jigittiń organlary bes adamnyń ómirin qutqarǵan bolatyn. Skeıtbordpen syrǵanap júrip, aýyr jaraqat alǵan ol pavlodarlyq jigit te aýrýhanada kóz jumǵan. Marqumnyń týystary onyń ishki organdaryn muqtaj jandarǵa berý jóninde sheshim qabyldaǵan. Sol donorlyq kómektiń arqasynda aman qalǵandardyń ishinde 14 jastaǵy aqmolalyq oqýshy qyz ben 67 jastaǵy astanalyq zeınetker de bar.

Aýyr soqqydan kóz jumǵan taǵy bir donor pavlodarlyq 32 jastaǵy jigittińde júregi basqa bir adamǵa ómir syılaǵan.