Jańaózendegi munaıshylardyń ereýiline Úkimet aralasty. Búgin «Burǵylaý» dep atalatyn jeke menshik kompanıanyń júzdegen jumysshysynyń shýyna qatysty Densaýlyq saqtaý jáne áleýmettik damý mınıstri málimdeme jasady, - dep habarlaıdy Qamshy.kz KTK arnasyna silteme jasap.

Tamara Dúısenovanyń aıtýynsha, 6 kún boıy qarsylyq bildirip jatqandardyń talabyn oryndaý qıyn. Degenmen, qazir munaıshylarmen kelisimge kelý máselesi qaralyp jatyr eken.

Tamara Dúısenova, QR Densaýlyq saqtaý jáne áleýmettik damý mınıstri:

-Jumys ornyndaǵy azamattar «QazMunaıGazdaǵy» sıaqty birdeı eńbekaqy tóleý júıesine ótý máselesin kóterip otyr. Eńbek zańyna sáıkes, bul «QazMunaıGazdyń» mekemelerine ǵana tıisti. Eger de basqa mekemelerde osyndaı birińǵaı júıedegi eńbekaqyǵa ótýi úshin olarda salalyq kelisim shartta belgilenýi kerek. Eger salalyq kelisim shartta bul qaralatyn bolsa, bul mekemelerdiń bárine osyndaı jańa júıeni engizýge bolady.

Iaǵnı, jumysshylardyń talabyn oryndaý ońaıǵa soqpaıdy. Ol úshin Eńbek kodeksine ózgertýler engizý qajet deıdi mınıstr. Sol úshin Mańǵystaý oblysynyń ákimi Alık Aıdarbaev munaıshylarmen tatýlasýdyń basqa joldaryn izdeýge kirisken. Aımaq basshysy búgin Jańaózenge kelip ereýilshilerdiń belsendileri men kompanıa jetekshileriniń basyn qosyp, jıyn ótkizip jatyr. Biraq qandaı kelisim jasalǵany ázirge belgisiz. Óıtkeni, jıyn jabyq ótýde. Al, basshylyqtan aqshalaryn kóterýdi talap etip, jumysqa shyǵýdy qoıǵan munaıshylar keńseleriniń aldynan keter emes. Jumysshylardyń talaby burynǵydaı, ulttyq kompanıalardaǵydaı jalaqy tóleýdiń biryńǵaı júıesin engizý.