Ekonomıkalyq jáne sybaılas jemqorlyqqa qarsy kúres agenttigi qarjy pıramıdasyn uıymdastyrǵandarǵa qylmystyq is qozǵaý jóninde zańǵa ózgerister engizý týraly usynys jasady. Ózgerister men tolyqtyrýlar engizilgen jańa zań boıynsha qarjy pıramıdasynyń qyzmeti alaıaqtyqqa jatatyn bolady.

Ótken ǵasyrdyń toqsanynshy jyldarynda eldi dúrliktirgen «Smaǵulov K» kompanıasynyń qarjy pıramıdasy reseılik Sergeı Mavrodı túrmeden shyqqannan keıin «MMM - 2011» degen atpen Qazaqstanda qaıta paıda boldy. Burynǵy «MMM dollarlar» MAVRO dep ózgertilip, Mavrodı belgilegen baǵamen, únemi baǵamy ósip otyratyn qundy qaǵaz retinde satyldy. Aı saıyn on paıyzǵa baǵamy ósip otyratyn MAVRO-ny paıda tabý úshin satyp alýshylar kóbeıdi. MMM - 2011 jumysyn «asa iri kólemde uıymdasqan toppen jasalǵan alaıaqtyq» dep tapqan Máskeý polısıasy bıylǵy jyldyń 7 maýsymynda belgisiz tulǵalarǵa qatysty qylmystyq is qozǵaǵan. MMM - 2011 Qazaqstanǵa kelisimen qarjy polısıasy onyń jumysy qarjy pıramıdasyna uqsas ekenin eskerte bastaǵan. Alaıda osy kezge deıin MMM - 2011 ústinen qarjy polısıasyna eshkim shaǵym túsirmegen. Degenmen saq bolǵan jón, reseılikter MMM - 2011-di qarjy pıramıdasy retinde tanyp, qylmystyq is qozǵap jatsa, onyń arty bylyq degen sóz. Qarjy polısıasynyń resmı ókili Murat Jumanbaıdyń málimdeýinshe, sońǵy úsh jyldyń ishinde respýblıka boıynsha 17 qarjy pıramıdasy toqtatylǵan. Osy ýaqyttyń ishinde pıramıdany uıymdastyrýshylar bes myńǵa jýyq qazaqstandyqty taqyrǵa otyrǵyzǵan. Qazaqstan zańynda qarjy pıramıdasy týraly naqty anyqtama joq jáne mundaı qurylymdardyń qyzmetine zańmen tikeleı tyıym salynbaǵan. Sondyqtan mundaı qu­rylymdardyń qyzmeti alaıaqtyqqa jatqyzylýy tıis. Ol úshin qarjy polısıasy qarjy pıramıdasyn uıym­dastyrýshylardyń áreketterin Qyl­mystyq kodekstegi 177-bapqa (alaıaq­tyq) sáıkestendirýdi usynyp otyr. Budan buryn Kókshetaý, Petropavl qalalarynda qarjy pıramıdasyna qatysty daý shyǵyp, quqyq qorǵaý organdarynyń aralasýymen «Mıkrokredıtnaıa organızasıa «KazRosInvestproekt» JSHS qyzmeti áreń toqtatylǵan bolatyn. Sol kezderde Májilis depýtaty Merýert Qazbekova Qazaqstanda qarjy pıramıdasyna zań júzinde tyıym salý jóninde Premer-mınıstr Kárim Másimovke depýtattyq saýal joldaǵan bolatyn. Endi qarjy polısıasynan Úkimetke zańǵa ózgertýler engizý týraly usynys túsedi. Qaıyrjan TÓREJANOV

"Aıqyn" gazeti

Sýret: mobime.ru