Atyraýdaǵy №2 qylmystyq ister boıynsha sotynda búgin azamattyq belsendiler Maks Boqaev pen Talǵat Aıannyń ústinen qozǵalǵan qylmystyq is boıynsha sottyń aldyn ala tyńdaýy bastaldy, - dep habarlaıdy Qamshy.kz Azattyqqa silteme jasap.
Azattyq tilshisiniń habarlaýynsha, sotqa sýdıa Gúlnár Dáýleshova tóraǵalyq etip jatyr. Sotqa ózge de aımaqtardan quqyq qorǵaýshylar, oblys turǵyndary, Qulsary men bireneshe aýdannan adamdar qatysýǵa keldi. Sot ótetin ǵımaratta baqylaý kúsheıtildi. BAQ ókilderine sot zalynan foto jáne beıne jazba túsirýine bes mınýtqa ǵana ruqsat berilip, odan soń bólek bólmege shyǵaryp jiberdi.
Sot bastalǵanda Boqaev pen Aıannyń advokaty Tólepqalı Aıanov sýdıa Gúlnár Dáýleshovany isten shettetý týraly óitinish jasady. Tólepqalı Aıanov sot tergeýiniń aıyptaý aktisi 30 qyrkúıekte daıyn bolǵanymen, ol sol kúni emes, 3 qazanda jarıalanǵanyn, al is materıaldary 73 tomnan turatyndyqtan ony osy aralyqta sottyń onymen tanysyp shyǵýy múmkin bolmaǵanyn aıtty.
«Sýdıa aıyptaý aktisi shyqqan soń ony birden reestrge engizýi tıis edi, biraq ony ýaqytynda engizbegen. Bul degenimiz sot isin falsıfıkasıalaý dep sanalatyndyqtan sýdıany isten shettetýdi suraımyn», - dedi advokat.
Budan soń sýdıa ótinishke qatysty sheshim qabyldaý úshin bes mınýttyq úzilis jarıalady. Úzilisten soń sotqa ózge Dúısebalıeva degen sýdıa kelip, advokattyń ótinishi qanaǵattandyrylmaıtynyn aıtyp, sot zalynan shyǵyp ketti. Osy kezde Maks Boqaev «Eshnárse estilgen joq, sýdıa durys oqymady» dep narazylyǵyn bildirdi. Bul sýdıa aqyryn sóılegendikten ne aıtqany sot barysyn ózge bólmede monıtor arqyly tyńdap otyrǵan jýrnalıserge durys estilmedi.
Sotqa kelgen quqyq qorǵaýshy Amangeldi Shormanbaev «Eger sottyń aldyn ala otyrysynyń ózi osyndaı jaǵdaıda ótse, onda bul prosestiń shynaıy ótetinine kúmánim zor», - dedi.
Budan soń sotta tústen keıinge deıin úzilis jarıalandy.
Maks Boqaev pen Talǵat Aıan 24 sáýir kúni Atyraý qalasynda jer reformasyna qarsylyq retinde ótken jappaı mıtıńten soń qamaýǵa alynǵan. Maks Boqaev pen Talǵat Aıanǵa birqatar qylmystyq baptar («Áleýmettik arazdyq týǵyzý», «Tótenshe jaǵdaı rejıminde jalǵan aqparat taratý», «Mıtıńiler ótkizý tártibin buzý») boıynsha aıyptary taǵylǵan. Azamattyq belsendiler bul aıyptardyń eshqaısysyn moıyndaǵan joq. Qamaýdaǵy Maks Boqaevtyń týystary onyń densaýlyǵyna alańdaıdy.
10 qazanda Human Rights Watch halyqaralyq uıymynyń Eýropa jáne Ortalyq Azıa boıynsha zertteýshisi «Maks Boqaev pen Talǵat Aıan qarsylyq bildirý quqyǵyn paıdalanǵany úshin de, ózgelerdi qarsylyq bildirýge shaqyrǵany úshin de qamalmaýy tıis. Úkimet saıasatyna qarsylyǵyn bildirý - qylmys emes» dep málimdegen.
Vıdeo "Aqjaıyq" saıtynan alyndy
