Din isteri jáne azamattyq qoǵam jónindegi mınıstrlik salafızmge qatysty negizgi ustanymyn bildirdi, - dep habarlaıdy Qamshy.kz.

Mınıstrliktiń baspasóz qyzmeti Qazaqstan aýmaǵynda salafızm aǵymyna zańmen tyıym salýǵa qatysty vedomstvo basshysy Nurlan Ermekbaevtyń pikirin joldady.

Suraq: Qazirgi kúnde qoǵamda jáne sarapshylar ortasynda «salafızmge» tyıym salý máselesi talqylanýda. Mınıstrliktiń osy máselege qatysty ustanymy qandaı?

Jaýap: N.Ermekbaev. Rasynda qoǵam ishinde salafızmge tyıym salýdy qoldaıtyn jáne oǵan qarsy ártúrli pikirler aıtylyp jatyr.

Osyǵan baılanysty salafızm máselesine qatysty din salasyndaǵy ýákiletti organ retinde Mınıstrliktiń ustanymyn qoǵamǵa jetkizýge ruqsat etińizder.

Mınıstrlik qazirgi kúnde tıisti memlekettik organdarmen birlesip osy máseleni muqıat qarastyrýda.

Osyǵan deıin Qazaqstanda 23 lańkestik jáne ekstremıstik uıymdarǵa, sonyń ishinde salafıttik baǵyttaǵy «At-Tákfır Ýál-Hıdjra» ekstremıstik uıymyna, tyıym salynǵandyǵyn atap ótkim keledi.

Osy rette salafızm uıym emes ekendigin atap ótý qajet. Ol - dinı aǵym, kózqarastar júıesi.

Elimizdiń qoldanystaǵy zańdary qazirdiń ózinde zańsyz ýaǵyz júrgizý, jasyryn dinı jıyndar men radıkaldy dinı ádebıetterdi taratýdyń jolyn kesýge barlyq múmkindikterdi beredi.

Olardy oryndaýdy qamtamasyz etý kerek.

Salafızm taqyrybyna keletin bolsaq, memlekettik qurylysy sharıǵatqa negizdelgen jekelegen elderde salafızmge jaqyn dinı aǵymdar dástúr retinde ornyǵýy múmkin.

Al Qazaqstanǵa keler bolsaq, otandyq dintanýshylardyń pikirinshe, salafızm Qazaqstan úshin aıtarlyqtaı qaýip týdyratyn áleýetke ıe.

Salafızm ustanýshylarynyń óz ıdeıalary men qundylyqtaryn bizdiń ulttyq mádenıetimizden, rýhanı dástúrlerimiz men qundylyqtarymyzdan joǵary qoıady.

Salafılerdiń barlyǵy ashyq aıtpasa da qatań dinı qaǵıdalarǵa qurylǵan memleketti qoǵamdyq qurylystyń «ıdealdy  júıesi» dep esepteıdi.

Biz qazirgi kúnde ıslam áleminde, sonyń ishinde birqatar arab elderiniń ózinde, salafızm ıdeıalary bedeldi dinı tulǵalar men  zamanaýı ıslam oıshyldary tarapynan synǵa ushyrap otyrǵanyn kórip otyrmyz.

Biz osyǵan baılanysty salafızmdi Qazaqstan Respýblıkasy úshin múldem jat ári teris dinı aǵym dep sanaımyz.

Elimizge syrttan kelgen bul dinı aǵym kún ótken saıyn halyq tarapynan toıtarysqa ushyraýda.

Jalpy, qazaqstandyq qoǵam radıkalızmge jeteleıtin bul jat aǵymǵa teris kózqarasta.

Osy sebepti búgingi kúnde elimizdegi salafızm jaqtastarynyń sany azaıyp jatqandyǵy baıqalady jáne olardyń Qazaqstanda uıymdasqan qurylymdary joq.

Sondyqtan aldaǵy ýaqytta salafızm ıdeologıasyn nasıhattaıtyn uıymdardyń paıda bolýyna, ádebıetteriniń taralýyna jáne ınternet-saıttarynyń jumystaryna jol bermeıtin bolamyz.

Qajet bolǵan jaǵdaıda, Qazaqstan musylmandary dinı basqarmasyna dindar azamattar tarapynan el meshitterinde bekitilgen tártip erejelerin saqtaýǵa kómektesetin bolamyz.

Biz qazaqstandyq dana halqymyz elimizge jat salafızm aǵymynyń taralýyna zańmen tyıym salmaı-aq jol bermeıdi jáne zaıyrly qaǵıdattardy basshylyqqa alatyn demokratıalyq Qazaqstandy qurýdy tańdaıdy dep senemiz.

Bul tańdaýdy Qazaqstannyń árbir azamaty qoldaýy tıis. Jumyla kótergen júk jeńil.