Parlament Májilisinde «Parıj kelisimin ratıfıkasıalaý týraly» zań jobasy boıynsha jumys tobynyń otyrysy boldy. Jumys tobynyń jetekshisi Ersultan Bekturǵanov óz sózinde Qazaqstan ǵalamdyq klımattyń jaqsarýy baǵytyndaǵy halyqaralyq kelisimderge qosylyp otyratynyn jetkizdi.
Ol «Qazaqstan-2050» Strategıasy ekonomıkanyń tıimdi modelin ustanyp, elimizdiń jańa «jasyl» jol damýyna ótýdiń negizine naqty baǵyt kórsetip otyrǵanyn atap ótti. Klımattyń ǵalamdyq ózgerýiniń basty máselelerin sheshýdiń taǵy bir kezeńi ústimizdegi jyly qol qoıylǵan Parıj kelisimi bolyp tabylady. Qorshaǵan ortaǵa erekshe kóńil bólip, «Bolashaqtyń energıasy» degen atpen ótkeli otyrǵan EKSPO-2017 halyqaralyq kórmesi qarsańynda Parıj kelisiminiń orny bólek bolmaqshy.
Otyrysta sóz alǵan Energetıka mınıstriniń orynbasary Ǵanı Sádibekov «Parıj kelisimi» 2015 jylǵy jeltoqsanda Birikken Ulttar Uıymynyń Klımattyń ózgerýi jónindegi negizdemelik konvensıasynyń Parıj qalasynda qabyldanǵanyn málimdedi. Bul kelisim ornyqty damý jáne kedeılikti joıý jónindegi kúsh-jigermen qatar, klımattyń ózgerýi qaýpine jahandyq den qoıýdy kúsheıtýge baǵyttalady.
«Parıj kelisimi» ornyqty damý salasyndaǵy maqsattarǵa jetýge yqpal etedi jáne klımattyń ózgerýine turaqtylyqty nyǵaıtýǵa múmkindik beretin sharalardyń «jol kartasy» bolyp sanalady. Sonymen birge, «Parıj kelisimi» sheńberinde klımattyń ózgerýine beıimdelý jónindegi erejeler qamtylady.
Zań jobasyn jasaýshylar atap kórsetkendeı, «Parıj kelisimin» ratıfıkasıalaýdyń halyqaralyq deńgeıde de saıası yqpaly joǵary. Memleket basshysynyń «bolashaqtyń energıasy» jáne «jasyl» ekonomıka týraly aıtqanyndaı, klımattyń ózgerýine aıryqsha áseri bolady.
Kún tártibindegi máseleni talqylaý barysynda «Tabıǵat» ekologıalyq qaýymdastyǵynyń jetekshisi Mels Eleýsizov sý men ormanǵa, muzdyqtar men qaldyqtarǵa qatysty máselelerdi qozǵady. Jınalǵandardy balamaly kýat kózin izdestirýge shaqyryp, qarjylandyrý kózi tabylyp jatsa, qorshaǵan ortany qorǵaýǵa, klımattyń ózgerýiniń aldyn alýǵa jumsaý týraly usynysyn bildirdi.
Basqa da sóz alǵandar ekologıalyq baǵdarlamalardy júzege asyryp, qoǵamdyq kólikterdi halyqaralyq talaptarǵa sáıkes damytý qajettigin aıtty. Depýtat Beıbit Mamraev joǵary oqý oryndarynda ekolog-mamandardy daıarlaý qajettigine basa nazar aýdardy. Al depýtat Maıra Aısına eldiń arasynda, ásirese, jastarmen jáne iri óndiris oryndarynda ekologıalyq saýattylyqty júrgizý qajettiligine toqtaldy.
Jumys tobynyń jetekshisi E.Bekturǵanov kún tártibindegi máseleni qoryta kele, aıtylǵan usynystardyń bári tıesili oryndar tarapynan eskeriletinin atap ótti.
Ǵabıt İSKENDERULY,
