Bul týraly Aqordanyń baspasóz qyzmeti habarlady.
Rásim barysynda Qazaqstan Prezıdentine Avstrıa Respýblıkasynyń Tótenshe jáne ókiletti elshisi Gerhard Saıller, Vatıkannyń Tótenshe jáne ókiletti elshisi Frensıs Assızı Chýllıkatt, Germanıa Federatıvtik Respýblıkasynyń Tótenshe jáne ókiletti elshisi Rolf Mafael, Grekıa Respýblıkasynyń Tótenshe jáne ókiletti elshisi Aleksandros Katranıs, Qatar Memleketiniń Tótenshe jáne ókiletti elshisi Ahmad ben Álı Ábdýrrahman ál-Djamıl ál-Tamımı, Nıderland Koróldiginiń Tótenshe jáne ókiletti elshisi Dırk Ian Kop, Shveısarıanyń Tótenshe jáne ókiletti elshisi Ýrs Shmıd, Japonıanyń Tótenshe jáne ókiletti elshisi Itıro Kavabata senim gramotalaryn tapsyrdy.
Nursultan Nazarbaev elshilerdi Qazaqstandaǵy dıplomatıalyq mısıalarynyń resmı túrde bastalýymen quttyqtap, olardyń qyzmeti elderimiz arasyndaǵy yntymaqtastyq aıasyn odan ári nyǵaıtýǵa tyń serpin beretinine senim bildirdi.
Qazaqstan Prezıdenti dıplomattardyń Astanadaǵy jumysy mańyzdy mereke – el táýelsizdiginiń 25 jyldyǵy qarsańynda bastalýynyń sımvoldyq máni bar ekenin atap ótti.
– Bizdiń elimiz bul merekelik mejege jaqsy nátıjelermen jetip otyr. Qazaqstan shırek ǵasyrda damýdyń kúrdeli kezeńinen ótti. Qol jetkizgen jetistiktermen shektelmeı, el irgesin bekemdeý úshin kelesi kezeńge arnalǵan jańa maqsat-mindetter belgiledik, – dedi Nursultan Nazarbaev.
Memleket basshysy elimizdiń syndarly jáne beıbit bastamalar, úılesimdi kópjaqty syrtqy saıasat arqyly halyqaralyq arenada zor bedelge ıe bolǵanyn aıtyp ótti.
– Buǵan Qazaqstannyń 2017-2018 jyldardaǵy Birikken Ulttar Uıymy Qaýipsizdik Keńesiniń múshesi bolyp saılanýy dálel. Biz Qaýipsizdik Keńesiniń múshesi retinde álem nazaryn óz óńirimizge aýdaryp, Ortalyq Azıa úshin ózekti máselelerdi kóteretin bolamyz, – dedi Qazaqstan Prezıdenti.
Nursultan Nazarbaev Qazaqstannyń Jahandyq antıadrolyq qozǵalysqa bastamashy bolyp, onyń kóshbasshysyna aınalǵanyna nazar aýdardy.
– Osy rette, biz jańa bastama kóterdik. Men ıadrolyq qarýsyzdaný men jahandyq qaýipsizdikke qosqan úlesi úshin halyqaralyq syılyq taǵaıyndaý jóninde sheshim qabyldadym. Atalǵan syılyqtyń alǵashqy laýreaty bolyp Iordanıa koroli İİ Abdalla tańdaldy. Budan keıin arnaýly komıtet qurylyp, onyń sheshimimen syılyq jyl saıyn Semeı polıgonynyń jabylǵany kúni – 29 tamyzda tapsyrylatyn bolady, – dedi Elbasy.
Memleket basshysy Qazaqstannyń Japonıamen yntymaqtastyǵynyń strategıalyq mańyzyn atap ótti.
– Premer-mınıstr Sındzo Abeniń byltyrǵy qazandaǵy Astanaǵa alǵashqy sapary aıtýly oqıǵa boldy. Meniń Tokıoǵa bıylǵy qarashadaǵy saparym qarym-qatynasymyzdy jańa sapaly deńgeıge shyǵarýǵa yqpal etedi dep senemin, – dedi Nursultan Nazarbaev.
Qazaqstan Prezıdenti Grekıamen baılanystarymyzdy damytýdyń eleýli perspektıvalaryna toqtaldy.
– Grek áriptesterimizdiń saıası, saýda-ekonomıkalyq jáne mádenı-gýmanıtarlyq ózara is-qımyldy jandandyrý nıetin qoldaımyz, – dedi Memleket basshysy.
Elbasy Germanıamen ózara is-qımyl Qazaqstan úshin Eýropalyq baǵyttaǵy yntymaqtastyqta erekshe mańyzǵa ıe bolyp otyrǵanyn aıtty.
– Biz asa jemisti jáne ózara senimge negizdelgen bıik deńgeıdegi dıalogty joǵary baǵalaımyz. Berlınge 2012, 2015 jyldardaǵy saparlarym jáne Federaldyq kansler Angela Merkeldiń Astanaǵa 2010 jylǵy sapary ekijaqty qarym-qatynasty jańa sapaly deńgeıge kóterdi. Yntymaqtastyq barysynda Shıkizat, ónerkásip jáne tehnologıa salalaryndaǵy kelisimniń jáne Qazaqstanda Germanıanyń dýaldy bilim berý modelin engizý týraly kelisimniń júzege asýynyń máni erekshe zor. Eýropadaǵy qaýipsizdik jáne yntymaqtastyq uıymyndaǵy bıylǵy Germanıa tóraǵalyǵynyń basymdyǵy bar baǵyttaryn jáne Berlınniń osy uıymǵa qatysýshy elder arasyndaǵy ózara senimdi qaıta qalpyna keltirý jónindegi kúsh-jigerin qoldaımyz, – dedi Nursultan Nazarbaev.
Memleket basshysy Qazaqstannyń Shveısarıa elimen dıalogy qarqyndy damyp kele jatqanyn atap ótti.
– Ekonomıka jáne ınvestısıa salalarynda aıtarlyqtaı áleýet bar. 2016 jyldyń 7 aıynyń ishinde ekijaqty taýar aınalymy 2,2 mıllıard AQSH dollaryna jetti. Osy mindetti júzege asyrýǵa Saýda-ekonomıkalyq yntymaqtastyq jónindegi úkimetaralyq komısıa men Qazaqstan-SHveısarıa iskerlik keńesi óz úlesin qosýǵa tıis, – dedi Qazaqstan Prezıdenti.
Nursultan Nazarbaev Nıderlandtyń bizdiń otandyq ekonomıkaǵa qosqan aıtýly úlesine nazar aýdardy.
– Nıderland bizdiń ekonomıkadaǵy sheteldik ınvestorlardyń kóshin bastap tur. Gaagaǵa 2014 jylǵy saparym jáne Premer-mınıstr Mark Rútteniń byltyrǵy jeltoqsandaǵy Astanaǵa sapary ekijaqty ózara is-qımyldy nyǵaıtýǵa tyń serpin berdi. Nıderlandty Birikken Ulttar Uıymy Qaýipsizdik Keńesiniń 2018 jylǵy turaqty emes músheligine saılanýymen quttyqtaımyn, – dedi Memleket basshysy.
Qazaqstan Prezıdenti elimizdiń Vatıkanmen aradaǵy qarym-qatynasty aıryqsha baǵalaıtynyn aıtty.
– Rım Papasy II Ioann Paveldiń 2001 jylǵy qyrkúıektegi Qazaqstanǵa sapary barlyǵymyz úshin aıtýly oqıǵa boldy. Sol joly ol Qazaqstan jerinde «Zorlyq-zombylyqsyz álem» qurýǵa shaqyrǵan bolatyn. Álemdik jáne dástúrli dinder lıderleri sezi jumysyna Vatıkannyń mártebeli ókilderiniń belsene qatysqanyn joǵary baǵalap, rızashylyq bildiremiz, – dedi Nursultan Nazarbaev.
Memleket basshysy Avstrıamen arada jemisti dıalog ornaǵanyn atap ótti.
– Osy aıda ótetin Qazaqstan men Avstrıa úkimetaralyq komısıasy men İskerlik keńestiń kezekti otyrysyna zor mán beremiz. Avstrıadaǵy áriptesterge 2017 jyly Eýropa qaýipsizdik jáne yntymaqtastyq uıymyna tóraǵalyq etý barysynda tabys tileımiz. Biz qaýipsizdikti qamtamasyz etý, Batys pen Shyǵys arasyndaǵy dıalogty nyǵaıtý máselesi boıynsha yntymaqtasýǵa ázirmiz, – dedi Qazaqstan Prezıdenti.
Budan bólek, Nursultan Nazarbaev Katardy Qazaqstannyń syrtqy saıası bastamalaryn árdaıym qoldaıtyn arab jáne musylman álemindegi mańyzdy áriptes retinde qarastyratynyn jetkizdi.
– Qatar ámiriniń 2014 jylǵy Astanaǵa sapary, meniń byltyrǵy Dohaǵa saparym ekijaqty sapaly ózara is-qımyldy nyǵaıtýǵa septigin tıgizdi. Ekonomıkalyq yntymaqtastyq aıasyn keńeıte túsý úshin Parsy shyǵanaǵymen baılanystyratyn «Qazaqstan – Túrikmenstan – Iran» temirjolynyń múmkindigin paıdalaný mańyzdy, – dedi Nursultan Nazarbaev.
Sońynda Qazaqstan Prezıdenti rásimge qatysýshylardy Astanadaǵy dıplomatıalyq qyzmetteriniń bastalýymen taǵy da quttyqtap, olarǵa jáne otbasylaryna zor densaýlyq, tabys tiledi.
