«Qamshy» portaly keshe Darqan Qaletaevtiń Senat depýtaty bolyp taǵaıyndalǵanyn habalaǵan edi. Osyǵan oraı búgin Baýyrjan Júsipuly esimdi azamattan hat qorjynymyzǵa kelip túsken myna materıaldy nazarlaryńyzǵa usynýdy jón kórdik.
Qaletaev – jas saıasatker
Darhan Qaletaev eń bastysy kadrlyq rezervtegi jas býynnyń ókili. Ol, jaqynda ǵana 44 jasqa toldy. Darhan Amanuly 1972 jyly 14 qazanda Shyǵys Qazaqstan oblysynyń Tarbaǵataı aýdanynda ómirge kelgen. Tarıh mamandyǵy boıynsha Shyǵys Qazaqstan memlekettik ýnıversıtetin 1994 jyly btirgen ol, 1996-1997 jyly QR Prezıdenti janyndaǵy Memlekettik basqarý ulttyq joǵary mektebin bitirdi ári sol jyldary birden joǵary bılik satysynda qyzmet atqardy. 1995-1996 jyldary Qazaqstan Respýblıkasynyń ulttyq saıasat jóninde memlekettik komıtettiń bas mamany, jetekshi maman bolyp qyzmet atqardy. Ol, nebári 30 jasynda Qazaqstan Respýblıkasy Mádenıet, aqparat jáne qoǵamdyq kelisim mınıstrligi Jastar isi jóninde departamentiniń basshysy bolyp jumys istedi. 2002-2004 jyldary Qazaqstan Respýblıkasy Prezıdent Ákimshiligi İshki saıasat sektorynyń meńgerýshisi, Bólim basshysy boldy. 2007 jyly Prezıdent Ákimshiligi jetekshisi orynbasary bolǵan Qaletaev atqarýshy bılik partıasynda da, 2008 jyldan keıin bir jyldan astam basshy bolyp qyzmet atqardy. Ol kezde bas partıa "Nur otan" halyqqa jaqyn partıa bolyp kórindi. Tipti keıbir partıa Nurotanmen birigip, bıliktiń saıası qýaty kúsheıdi. Ol, Senat depýtaty bolyp saılanǵanyna deıin tup-týra 7 jyl «Samuryq-Qazyna» ulttyq ál-aýqat qorynyń basqarýshy dırektory qyzmetin atqardy.
«Samuryq-Qazyna» qorynyń jalǵyz aksıoneri memleket bolyp tabylady. Qor bıliktiń «100 naqty qadam», «Qazaqstan 2050» sıaqty strategıalarynda orasan jumys atqardy. Halyqqa turǵyn úı usynatyn Turǵyn úı baǵdarlamalaryn, ár túrli ınovasıalyq jobalardy qolǵa aldy. Qaletaev qyzmetke kelgennen keıin, «Samuryq qazyna» aıtarlyqtaı qyzmet atqardy. Bul týraly ol suhbattarynyń birinde ««Samuryq-Qazyna» qory álemdik úderisterdiń arnasynda» dep ataǵan edi. Ol bılikke kelgennen keıingi kompanıanyń atqarǵan eleýli jumystarynyń biri retinde «Halyqtyq IPO» baǵdarlamasyn atap ótýge bolady. Osy baǵdarlamanyń arqasynda kóptegen otandastarymyz ulttyq kompanıalardyń belgili mólsherde aktıvterine ıe boldy. «Samuryq-Qazyna» qory 550-den astam asa iri kásiporyndy baqylady. Qor jáne qorǵa qarasty kompanıalar atqarǵan jumystary aıasynda áleýmettik jaqsartý baǵytynda mıllıardtaǵan teńge bóldi. Bul tikeleı Qaletaevtiń basshylyǵynyń jemisi edi. «Samuryq-Qazyna» UÁQ bólimsheleri men qurylymdarynda 300 myńnan astam adam jumys isteıdi. Olardyń otbasy múshelerin esepke alǵanda qor kásiporyndarynyń jumysy kem degende bir mıllıon qazaqstandyqtyń múddesine tıimdi qyzmet atqardy. Kompanıa jumysyna qatysty Qaletaev «Keıbir jeke menshik kompanıalarda, jahandyq daǵdarysqa jáne munaı baǵasynyń tómendeýine silteme jasaı otyryp, qazirdiń ózinde jalaqylar men personaldy qysqartýǵa daıyndalýda. Osynyń aıasynda «Samuryq-Qazyna» ulttyq ál-aýqat qorynyń memlekettik kompanıalaryn múlde basqa jaǵdaılar alańdatýda: munda áleýmettik áriptestikke jáne áleýmettik jaýapkershilik tásilderin ózgertýde, eńbek ujymdarynda ádilettilikke qol jetkizýge umtylýda. Teginde bul aradaǵy aıyrmashylyq, eger jeke bıznes tek qana aqsha sanaýmen aınalyssa, al holdıń memlekettiń saıasatyn iske asyrady» degen edi.
Qaletaev tek saıası-ekonomıkalyq basshylyq qyzmette bolǵan joq. Ol, sport salasynda demeýshi, janashyrlyq kórsetip keledi. 2015 jyly Qazaqstan velosport federasıasynyń prezıdenti boldy. Qaletaev fýtbol damytý týraly da «Jalaqynyń eń joǵarǵy shegi jylyna 300 myń dollar bolýy kerek dep esepteımin. Al qaısybir klýb quramyn jalaqysy budan da joǵary fýtbolshymen kúsheıtkisi kelse, 10 paıyzyn fýtboldy damytýǵa bólip otyrsyn» degen edi.
Darhan Amanuly keshe ǵana prezıdent jarlyǵymen Senat depýtaty boly. Onyń Parlament minberinde de ulttyq, áleýmettik máselelerge batyl ún qatyp, eldiń ekonomıkalyq, rýhanı qýatyn kúsheıtýge aıamaı eńbek etetini sózsiz. Memleketshil hám ultshyl saıası tulǵalar arasyndaǵy jas býyn retinde, Amanulyna aq jol tileımiz.
Baýyrjan Júsipuly
