Qazaqstan Prezıdenti Nursultan Nazarbaev Saýd Arabıasy Koróldiginde resmı saparmen boldy.

Medına qalasyna kelisimen Nursultan Nazarbaev provınsıa gýbernatory, hanzada Feısal ben Salman Ál Saýdpen ekijaqty kezdesý ótkizdi.
Budan bólek, Memleket basshysy Medına qalasyndaǵy Muhammed paıǵambar meshitine baryp, namaz oqydy, sondaı-aq Masdjıd an-Nábaýı meshitiniń sáýletimen jáne ıntererimen tanysty.  
Odan keıin Qazaqstan Prezıdenti Saýd Arabıasy Koroli Salman ben Ábdel Ázız Ál Saýdpen kelissózder nátıjesi boıynsha birqatar ekijaqty qujattarǵa qol qoıý josparlanyp otyrǵan Er Rıad qalasyna keldi.    
Kelissózder barysynda eki eldiń kósh­bas­shylary Qazaqstan men Saýd Arabıa­sy yntymaqtastyǵynyń negizgi baǵyt­taryn, atap aıtqanda, saýda-ekonomıkalyq, saıası jáne mádenı-gýmanıtarlyq salalardaǵy baılanystardy nyǵaıtý perspektıvalaryn talqylady.
Sondaı-aq taraptar ózara is-qımyldyń túrli salalarynda, sonyń ishinde aýyl sharýa­shylyǵynda zor áleýetke qol jetki­zilgenin jáne qarqyndy damý bar ekenin atap ótti.   
Sapar barysynda Memleket basshysy Saýd Arabıasy Koróldiginiń ash-SHýra Medjlısiniń basshysy Abdýllah ıbn Muhammed Ál-SHeıhpen, Islam yntymaqtastyǵy uıymynyń bas hatshysy Iad ıbn Ámın Madanımen, Islam damý bankiniń prezıdenti Bandar ben Muhammad Hadjarmen, Amiantit Group kompanıasynyń vıse-prezıdenti hanzada Týrkı ben Muhammad bın Fahdpen, sondaı-aq Saýd Arabıasy Koróldiginiń isker toptar ókilderimen kezdesti.

Saýd Arabıasynyń  álemdik deńgeıde ju­mys júrgizetin jetekshi kompanıa­larynyń basshylary qatysqan isker top­tar ókilderimen kezdesýde Qazaqstan Pre­zı­denti Saýd Arabıasy bizdiń elimiz­diń Taıaý Shyǵys aýmaǵyndaǵy negizgi serik­te­siniń biri ekenin aıtty. Elbasy eki eldiń ekonomıkalyq yntymaqtastyǵynyń perspektıvaly baǵyttaryn atap ótti. Olardyń arasynda taý-ken metalýrgıasy kesheni, munaı hımıasy, aýyl sharýashylyǵy, qarjy jáne ıslam bankıngi, atom ónerkásibi bar. «Qazaqstannyń strategıalyq maqsaty – álemniń eń ozyq 30 eliniń qataryna qosylý. Bul maqsatqa jetýdiń negizgi joly eldegi kásipkerlikti damytý, bızneske barynsha jeńildikter qarastyryp, ınvestısıa tartý úshin qolaıly jaǵdaılar jasaý», – dedi Nursultan Nazarbaev.
– Dúnıejúzilik banktiń «Bıznespen aınalysý jeńildigi» reıtıńinde Qazaqstan 41-shi orynǵa ıe boldy. Bıznes úshin ákimshilik kedergiler meılinshe azaıtyldy. Qazir bizde 10 arnaıy ekonomıkalyq aımaq qurylyp, onda lıberaldy salyq rejimi qoldanyla otyryp jumys júrgizilýde, – dep iskerlik jáne ınvestısıalyq ortany jaqsartý úshin elde qolǵa alynyp jatqan júıeli sharalarǵa toqtala kelip, Qazaqstan Prezıdenti Saýd Arabıasy kásipkerlerin ındýstrıalyq-ınnovasıalyq damý baǵdarlamasyn júzege asyrýǵa belsene qatysýǵa shaqyrdy. «Óz kezeginde Qazaqstan jan-jaqty qoldaý kórsetýge daıyn. Máselen, ınvestor korporatıvtik tabystan jáne jer salyǵynan 10 jylǵa, múlik salyǵynan 8 jylǵa bosatylady», – dedi Nursultan Nazarbaev.
Sonymen qatar Memleket basshysy qazir res­pýblıkada iri memlekettik nysandardy jekeshe­lendirý naýqany júrgizilip jatqanyn aıtty.
– Jalpy quny 10 mıllıard dollar bolatyn 800-deı memlekettik kásiporyn básekelestik ortaǵa shyǵaryldy. Tizimge memlekettiń úlesi bar taý-ken metalýrgıasy, munaı óńdeý, energetıka, kólik jáne baılanys salasyndaǵy kásiporyndar, ınfraqurylym nysandary engizilgen. Saýd Arabıasy kompanıalarynyń osy jekeshelendirý sharasyna qatysýyn qoldaımyz, – dedi Qazaqstan Prezıdenti.
Sonymen qatar Nursultan Nazarbaev «Astana» halyqaralyq qarjy ortalyǵynyń jumysyna jáne keler jyly «Bolashaqtyń energıasy» taqyryby boıynsha ótetin «EKSPO-2017» kórmesine toq­tal­dy.
Saýd Arabıasy bıznes qurylymdarynyń je­tekshileri Qazaqstanda jasalyp jatqan qolaıly ınvestısıalyq jaǵdaı úshin Memleket basshysyna alǵys bildirip, yntymaqtastyqty damytýǵa daıyn ekendikterin jetkizdi. Atap aıtqanda, olar aýyl sharýashylyǵy, munaı óńdeý, metalýrgıa jáne atom energetıkasy salalaryna qyzyǵýshylyq tanytty. 
Sońynda Qazaqstan Prezıdenti ózara tıimdi seriktestiktiń jańa múmkindikteri jasala beretinin jáne onyń perspektıvasyna senimdi ekenin aıtyp, Saýd Arabıasy bıznesiniń «kapıtandaryna» tabys tiledi. 
Saýd Arabıasy Koróldigine resmı saparynyń qorytyndysy boıynsha BAQ ókilderi úshin ótkizgen baspasóz brıfıńinde Nursultan Nazarbaev: 
– Sapar aıasynda energetıka, taý-ken salasy, aýyl sharýashylyǵy, saýda-sattyqqa qatysty jalpy quny 60 mlrd teńgeden asatyn 10 kelisimge qol qoıyldy. Atap aıtqanda, olardyń arasynda Ońtústik Qazaqstan oblysyndaǵy qus fabrıkasy, Aqmola oblysyndaǵy azyq-túlik óndirisi jónindegi kelisimder bar. Qazirgi tańda Qazaqstanda Saýd Arabıasynyń qatysýymen 17 kásiporyn jumys júrgizýde, – dep atap ótti.
Ekijaqty taýar aınalymyn ulǵaıtýǵa logıs­tıkalyq qıyndyqtar kedergi keltirip kelgenine toqtalyp ótken Elbasy: «Bul rette biz bolashaqta jemisti yntymaqtastyq ornatý úshin Jol kartasyn jasap, ekijaqty úkimetaralyq komısıa, ekonomıkanyń jekelegen salalary boıynsha jumys toptaryn qurý týraly kelisimge keldik. Bizdiń elde ortaq jobalardy qarjylandyrý úshin birlesken ınvestısıalyq qor qurý týraly ýaǵdalastyqqa qol jetkizildi. Sondaı-aq  men saý­dtyq seriktesterimizdi ın­ves­tısıalyq-ınno­vasıalyq jobalarǵa, «Nurly jol» baǵdar­lamasyna atsalysýǵa shaqyrdym. Bul Qazaq­stannyń paıdasy úshin yntymaqtastyq ornatýǵa óte jaqsy negiz bolady, – dedi.
Sonynmen qatar Memleket basshysy Ko­rol­­dikpen ózara is-qımyldyń perspektıvaly baǵytta­ryna nazar aýdardy.
– Saýdtyq seriktesterimizdiń kún men jel energetıkasyn paıdalaný tájirıbesi bar. Saýd Arabıasy energetıka salasyndaǵy ózderiniń jańa ázirlemelerimen Astanada ótetin «EKSPO-2017» halyqaralyq kórmesine belsene qatysatyn bolady. Sondaı-aq kelissózder barysynda biz munaı men gaz salasyndaǵy júrgizilip otyrǵan saıasatty talqyladyq. Jalpy, biz osy óńirdegi mańyzdy bul elde óte paıdaly ári asa qajetti kezdesýler ótkizdik dep sanaımyn, – dedi Qazaqstan Prezıdenti.

Rymtaı Saǵynbekova

«Ekonomıka gazeti»