Ońtústik Koreıanyń 64 jastaǵy Prezıdenti Pak Kyn Hege degen halyqtyń senimi tómendep barady. Osy aptada onyń el basshysy retindegi reıtıńi 17 paıyzǵa deıin tómendegen. Bunyń basty sebebi Pak Kyn He baıandamalarynyń mátinin túzetýmen aınalysatyn jaqyn qurbysymen baılanysty daýda bolsa kerek. Prezıdentti synaýshylar úkimette qyzmet istemeıtin adamǵa mańyzdy qujattardy berý memlekettik qupıanyń jarıa bolýyna ákep soǵatynyn eskertýde.
Pak Kyn He Koreıa respýblıkasynyń 11-shi Prezıdenti. Ol burynǵy Prezıdent Pak Chon Hıdiń qyzy. Pak Kyn He el basshysy laýazymyna 2013 jyldyń 25 aqpanynda otyrǵan.
Pak Kyn He 1952 jyly 2 aqpanda Tegýde dúnıege kelgen. Ol Prezıdent áýletindegi tuńǵysh bala. Pak Chı Man esimdi inisi jáne Pak Se Ón degen sińlisi bar.
Pak Kyn He Seýldegi orta mektepti 1970 jyly bitirgen soń Sogan ýnıversıtetinde ınjener-elektronık mamandyǵy boıynsha bakalavr dárejesin alǵan. Al 1987 jyly taıvandyq Qytaı mádenıeti ýnıversıtetin bitirgen. Ol sondaı-aq Koreıa jetekshi ǵylymı-tehnıkalyq ınstıtýty men Sogan ýnıversıtetinde túrli ǵylymı dárejelerge ıe bolǵan.
1981 jyly Pak Kyn He dinı oqý ornynda bir semestr bilim alyp, hrıstıan dinin zerttegen. Budan keıin ol saıası jolǵa túsken.
1974 jyly 15 tamyzda Pak Chon Hı áýletine qastandyq jasalady. Prezıdenttiń áıeli Iýk Ón Sý osy oqıǵa kezinde mert bop, eldiń «birinshi hanymy» tıtýly Prezıdenttiń qyzy Pak Kyn Hege ótedi. Prezıdent Pak Chon Hı áıeli qaza tapqan soń úılenbegen. 1979 jyly Pak Chon Hı Ulttyq barlaý agenttiginiń dırektory Kım Dje Gúdiń qolynan qaza tabady.
1998 jyly ulttyq jınalys (parlament) saılaýynda Pak Kyn He Uly el partıasy atynan Tegý aımaǵynan saılanady. Budan keıin ol 2008 jylǵa deıin osy aımaq boıynsha úsh márte depýtat atanady.
2004–2006 jyldary Pak Kyn He Uly el partıasyn basqarady. Barlyq saılaýda atalmysh partıanyń ókilderi jeńgendikten Pak Kyn He el arasynda «saılaý hanshaıymy» degen atqa ıe bolady. 2007 jyly Pak Kyn He Prezıdent saılaýyna túsedi. Alaıda partıa ishindegi saılaýda Lı Món Baktan jeńiledi. 2011 jyly reıtıńiniń tómendeýine baılanysty partıa ataýy Senýrı bolyp ózgertiledi. 2011 jyly 19 jeltoqsanda Pak Kyn He partıanyń Tótenshe komıtetiniń basshysy bolyp saılanady. Al 2012 Senýrı partıasy jeńiske jetip, Pak Kyn He Prezıdent taǵy úshin saılaýǵa túsedi.
2012 jylǵy Parlament saılaýynda Pak Kyn Heniń partıasy jeńiske jetip, Parlamenttegi 300 orynnyń 152-sin ıelenedi.
2012 jyly 20 tamyzda partıa ishindegi Prezıdent saılaýynda Pak Kyn He básekelesterin basyp ozyp, 83,97 % daýysqa ıe bolady. Sóıtip ol Prezıdent taǵynan úmitker atanady.
19 jeltoqsandaǵy saılaýda Pak Kyn He saılaýshylardyń 51,55% daýsyn jınaıdy. Sóıtip ol Ońtústik Koreıa tarıhyndaǵy alǵashqy áıel Prezıdent atanady.
Pak Kyn He Prezıdent taǵyna resmı túrde 2013 jyldyń 25 aqpanynda otyrady.
Pak Kyn Heniń otbasylyq jaǵdaıyna kelsek, ol úılenbegen, balasy joq.
Sharafat Jylqybaeva
