Bishkekten Máskeýge bet alǵan, 20 qyrǵyzstandyq otyrǵan avtobýs Qazaqstan aýmaǵynda jol-kólik apatyna ushyrady, - dep habarlaıdy QazAqparat.
«30 qazan kúni Qazaqstan aýmaǵynda shamamen tańǵy 04:00-de Qyrǵyzstannyń 20 azamaty otyrǵan avtobýs aýdaryldy. Barlyq jolaýshy eleýli jaraqat aldy. Bes adam aýyr jaralanyp, aýrýhanaǵa tústi», - dep jazdy avtobýs jolaýshysy Nýrkyz Nazarkýlova óziniń Facebook paraqshasynda.
Qazaqstandaǵy Qyrǵyzstan elshiligi aqparat alý maqsatynda QR SİM Konsýldyq qyzmetimen, QR İİM kezekshi bólimimen, QR İİM Tótenshe jaǵdaılar jáne Jol polısıasy komıtetterimen jáne Aqmola, Qaraǵandy, Soltústik Qazaqstan, Qostanaı jáne Aqtóbe oblysyndaǵy İİD kezekshi bólimderimen konsýltasıalar júrgizgenin habarlady.
«Joǵaryda atalǵan quziretti organdardyń málimetterine súıensek, bul jol-kólik oqıǵasy tirkelmegen. Sonymen birge, elshilik telefon arqyly N.Nazarkýlovamen tildesti. Onyń aıtýynsha, 2016 jyly 29-nan 30-qazanǵa qaraǵan túni tańǵy 05:30-da QR Aqtóbe oblysynda Mersedes-Sprınter júrgizýshisi kólikti basqara almaı, jyraǵa túsip ketken», - dep habarlaıdy elshilik.
Elshiliktiń habarlaýynsha, salonda 18 jolaýshy jáne 2 júrgizýshi bolǵan. Jol-kólik apatynan júrgizýshiler men jolaýshylar túrli jaraqat alǵan. Aqtóbe oblysy Hromtaý aýdanynyń dárigerleri qajetti kómek kórsetken soń, 13 jolaýshy ózge avtokólikpen Reseı Federasıasyna júrip ketti. 5 zardap shegýshi Qyrǵyzstanǵa qaıtý týraly sheshim qabyldady.
«N.Nazarkýlovanyń aıtýynsha, júrgizýshi-tasymaldaýshylarǵa esh shaǵym bolmaǵandyqtan, QR quzyrly organdaryna resmı habar berilmegen. Mersedes-Sprınter Bishkek qalasynan Máskeýge baǵyt alǵan, ondaǵy jolaýshylar men júrgizýshiler Qyrǵyzstan azamattary», - dep habarlaıdy elshilik.
