İle aýdanynyń Yntymaq aýylynan oryn tepken «Dolce-Pharm» JSHS Qazaqstandaǵy medısınaǵa asa qajetti buıymdar shyǵaratyn irgeli kásiporyndardyń birinen sanalady. Olaı deýge tolyq negiz bar. Sebebi, zaýyt jylyna 25 mln. medısınalyq buıymdar shyǵarýǵa qaýqarly, - dep habarlaıdy Qamshy.kz Almaty oblysy ákimdiginiń baspasóz qyzmetine silteme jasap.

Bul jobanyń jalpy quny 1 314 mln. teńge. Bul týraly Almaty oblysynyń óńirlik komýnıkasıalar qyzmeti İle aýdanyna uıymdastyrǵan kóshpeli brıfıńte jýrnalıserge zaýyt prezıdenti Raýl Ialymov baıandap berdi.

«Dolce» jáne «Dolce-Pharm» farmasevtıkalyq óndiristik-kommersıalyq kompanıalary 1998 jyly birikken bolatyn. Búginde olardyń ataǵy qolǵap, maska, bahıla jáne taǵy basqa da, medısınada bir ret qoldanylatyn buıymdarmen tanymal.

2010 jyly ISO 9001:2008 sapa menedjmenti júıesine, al 2011 jyly medısınalyq buıymdardyń halyqaralyq  ISO 13485 sapasyna qol jetkizgen kásiporynda 600-ge jýyq adam eńbek etedi. Zaýyttyń kókjıegi keń dep otyr mamandar. Olar shyǵaratyn ónimderimen bolashaqta óz elimizdi 90 prosentke qamtamasyz etýdi kózdeıdi.

Táýelsiz Qazaqstannyń ishki suranystaryn qanaǵattandyryp otyrǵan, sondaı-aq, respýblıkalyq ındýstrıalızasıa kartasyna engen «Dolce-Pharm» JSHS óz buıymdaryn  Ortalyq Azıa jáne TMD elderine eksporttaýǵa ázirlik ústinde.