Kirpish shyǵaratyn «BTK Grýpp» zaýytynyń irgesi 1997 jyly qalanǵan bolatyn. Bir jyldan soń alǵashqy qyzyl kirpishterin shyǵara bastaǵan.

Jobanyń jalpy quny 600 mln. teńge, al jobalyq qýaty 54 tonna gazoblok óndirýge negizdelgen.

İle aýdanynyń Ashybulaq aýylynda ornalasqan zaýyt bıyldan bastap gazoblok óndirýdi qolǵa aldy. Gazoblok shyǵarý úshin eń aldymen qum, ák, gıps, sement kerek. Al bul qospalardy alystan izdep qajeti joq, óz jerimizde bar. Máselen, sement – Shyǵys Qazaqstan, ák – Ońtústik Qazaqstan, gıps – Jambyl oblystarynan, al qum irgemizdegi Qapshaǵaıdan ákelinedi. Demek, shaǵyn zaýyttyń qanatyn keńge jaıa alatynyna senim mol degen sóz. Zaýyt jumysshylary on aı ishinde 20 myń gazoblok shyǵaryp úlgerdi.

Jıyrma bes jumysshysy bar «BTK Grýpp» JSHS «Damý» kásipkerlikti qoldaý qory arqyly 200 mln. teńge kóleminde nesıe alyp, qýatty qural-jabdyqtarǵa qol jetkizdi. Qytaı-Germanıa tehnologıasymen jumys isteıtin apparattardyń qulaǵynda oınaıtyn mamandanǵan segiz ınjener bar. Eńbekkerlerdiń ortasha jalaqysy 80 myń teńge. Bul týraly BAQ ókilderine Almaty oblysynyń óńirlik komýnıkasıalar qyzmeti uıymdastyrǵan kóshpeli brıfıńte «BTK Grýpp» zaýytynyń dırektory Toǵan Botabekov aıtyp berdi. Kezinde Máskeýden bilim alyp, osy ózi qolǵa alǵan salada 40 jyldan  beri ter tógip júrgen basshy keleshekte bul zaýyt kókjıegin keńeıtip, jańa jumys oryndaryn ashýǵa nıetti. Jáne de 54 tonnaǵa deıin gazoblok óndirýdi kózdep otyr.