Halyqaralyq «Shekarasyz reporterler» uıymy baspasóz bostandyǵyna tosqaýyl jasaǵan tanymaly tulǵalardyń tizimin jasady, dep habarlaıdy «Qamshy» portaly BBC-diń orys qyzmetine silteme jasap.

Atalǵan tizimge Reseı Prezıdenti Pýtın, Sheshenstan Respýblıkasy prezıdenti Ramazan Qadyrov bastaǵan lıderler taǵy da kirgen.

Aıta keter bolsaq, Pýtın atalǵan tizimnen 2000 jyldan, prezıdent bolǵaly beri shyǵa almaı keledi. Al, Qadyrov bolsa 2005 jyldan atalǵan tizimde.

Pýtın tizimde «ulttyq avtorıtarızm» taktıkasyn qoldanyp, baspasózge qysym jasaýshy tulǵa retinde oryn alǵan.

Tizim avtorlary «Sovet bıligi qulaǵaly berigi ýaqytta Reseıde múlde az táýelsiz aqparat kózi qaldy» deıdi. Pýtınniń baspasózge qysymyna «ylǵı da qıturqy zań qabyldaıtyn» Memlekettik Dýma, «Táýelsiz BAQ-ty satyp alatyn» olıgarhtar, kúshtik qurylymdar kómektesedi.

Tizimge sondaı-aq TMD elderinen Ázerbaıjan prezıdenti Ilham Alıev, Belorýs prezıdenti Aleksandr Lýkashenko, Qazaqstan prezıdenti Nazarbaev pen  Túrkmen basy Gýrbangýly Berdymýhamedovter de engen.

Sonymen qatar Qytaı, Túrkıa, Saýd Arabıa elderiniń de prezıdentteri tizimnen oıyp oryn alǵan.