Bórtken, terisken jáne ushyq
Pampers atty pále bar (Jaıalyqtan sadaǵa ketkir). Sosyn pamperstiń jarnamasy bar. Áý-basta ony kórshi eldiń tilinde jasaǵan. Sosyn bireý qazaqshalaǵan. Jarnamanyń bir tusynda mynadaı tirkes júr: "Aıaqtardyń arasyndaǵy ylǵaldy túıirshikterdiń paıda bolýyna jol bermeıdi". Endi biz osyny qazaqshalap kórelik. "Shapty bórtkizbeıdi". Anaý aýdarmadaǵy segiz sózdi atam qazaq eki-aq sózben jetkizipti. Biraq bizdiń "asa saýatty aýdarmashylar" bórtkendi bile qoımas. Sol sıaqty kózge nemese tilge shyǵatyn teriskendi. Eringe shyǵatyn ushyqty. Olar on jyldan asty "karısti" "tisjegi" dep jáne bir jańalyq ashyp tastaǵan. Barlyq jarnamada solaı. Naqty qazaqtyń sózi "qanqurt" edi. Aıtylǵany "qanǵurt". "Tisińe qańqurt túspesin" dep otyratyn jaryqtyq ájemiz. Al jáne bir jarnamadaǵy "aýyzdyń ishki qýysynda paıda bolatyn oıyqtyń" naq ataýy: "aýyzdyń ýylýy". O-o, osynyń bárin oılaǵanda en dalaǵa tentirep ketkiń keledi. Muqym Aqsýat "bizdiń Qaınar qaıda qarap otyr" demeýi úshin.