Úlken daýmen kúlli elge jaman aty shyqqan Qylmystyq atqarý júıesi komıtetiniń tóraǵasy qyzmetinen alyndy. Biraq general Baýyrjan Berdalınniń orny uzaq ýaqyt bos qalǵan joq. Búgin İshki İster mınıstri Qalmuhanbet Qasymov el túrmelerindegi tártipke jaýapty etip Azamat Bazylbekovty taǵaıyndady. 

Bul týraly Ktk arnasy habarlaıdy.

45 jastaǵy Bazylbekov buǵan deıin Qylmystyq atqarý júıesi komıteti tóraǵasynyń orynbasary bolǵan. Iaǵnı, jańa basshyǵa bul qyzmet tansyq emes. Aıta ketý kerek, sońǵy kezde elimizdegi túrmelerden jıi shý shyǵyp júr. Máselen, jýyrda ǵana jazasyn ótep júrgen kelinshekti zorlaǵany úshin túrme qyzmetkeri Rýslan Hakımov 9 jylǵa sottaldy. Al Natalá Slekshınanyń saqshydan balasy bar. Sondaı-aq, qoǵam belsendileri «abaqty esirtki bazaryna aınalǵan » dep shýlaǵan bolatyn. Ol azdaı túzetý mekemelerinde lańkesterdiń qatardaǵy sottalýshylarmen bir kamerada otyrýy jaǵdaıdy ýshyqtyryp otyr. Temir tordaǵy tártipsizdik sıaqty biraz bylyqtyń  bárin endi Azamat Bazylbekov retteýi tıis.