QR Investısıalar jáne damý mınıstrliginde «Nur Otan» partıasynyń «Birlik» fılıaly «Damý» bastaýysh uıymy men «LS Astana» JSHS ekologıalyq máselelerdi sheshýge baǵyttalǵan yntymaqtastyq týraly memorandýmǵa qol qoıdy.

Ekologıalyq máselelerdi sheshýde materıaldardy qaıta óndeý (qaǵaz, karton) jáne jınaýdy uıymdastyrýda uzaq merzimdi jáne ózara tıimdi yntymaqtastyq qurýdy kózdeıtin qujatqa QR IDM jaýapty hatshysy, «Nur Otan» partıasynyń «Birlik» fılıaly «Damý» bastaýysh uıymynyń tóraǵasy Zamır Saǵynov, «LS Astana» JSHS dırektory Sáýle Tájibaeva qol qoıdy.

Osy maqsatta «Transport Tower» ákimshilik ǵımaratynyń árbir qabatyna makýlatýra jınaıtyn arnaıy konteınerler qoıyldy. «LS Astana» JSHS qaıta óńdelgen ónimderden túsken qarjyny jetim balalarǵa jáne kópbalaly otbasylardyń balalaryna, zeınetkerler men múgedekterge demeýshilik  nemese qaıyrymdylyq kómek retinde berýge mindetteme aldy.

Jınalǵan barlyq eski gazet, jýrnaldar jáne paıdalanylǵan qaǵaz ónimderi qaıta óńdeýge jiberiledi. Osy arqyly orman aǵashtaryn tıimdi paıdalanyp, jappaı kesýden saqtaýǵa bolady. Ekologtardyń málimetterine súıensek, 1 tonna makýlatýra 30 adamǵa qajetti ottegin bóletin 10 taldy kesýden saqtap qalady eken. Sondaı-aq, 1000 kVt elektr energıasyn jáne 20000 lıtr tushshy sýdy únemdeıdi.