«Almaty Taýers» ǵımaratyndaǵy órt kezinde qaza bolǵandardyń otbasylaryna 3 mln. teńgeden materıaldyq kómek kórsetiledi. Bul týraly oqıǵa bolǵan jerdi aralaý kezinde Almaty ákimi Baýyrjan Baıbekke «Almaty Taýers» basqarýshy kompanıasynyń ókili Ablımıt Rahmatýllaev aıtty, dep habarlaıdy Baq.kz.
Qala ákimi marqumdardyń otbasylaryna kóńil aıtyp, jan- jaqty qoldaý kórsetýdi tapsyrdy.
«Qazirgi kezde olarǵa barynsha kómek kórsetip, jerleý men oǵan ketetin shyǵyn máselesin sheshý qajet. Eshkim nazardan tys qalmasyn. Komısıa barlyq tekserý jumysyn ashyq jáne jarıaly túrde júrgizedi. Qysqa merzim ishinde tolyq esep berilýi tıis», - dep atap ótti B.Baıbek.
«Almaty Taýers» basqarýshy kompanıasynyń ókili órtten qaza bolǵandardyń otbasylaryna búginnen bastap materıaldyq kómek beriletinin aıtty.
«Osy qaıǵyly oqıǵadan mert bolǵandardyń otbasylaryna kóńil aıtamyz. Bizdiń kompanıa basshylyǵy marqumdardyń otbasylaryna 3 mln. teńgeden qarjylaı kómek kórsetý týraly sheshim qabyldady. Bul tólemder búginnen bastap beriledi», - dedi A.Rahmatýllaev.
«Batýtnyı sentr» JSHS dırektory Daýren Tuıaqov jerleý rásimine kómek kórsetip, zardap shekkenderge ótemaqy tóleıtinin jetkizdi. Qaza bolǵan stýdentter bilim alǵan joǵary oqý oryndary da materıaldyq kómek kórsetetin bolady.
Almaty qalasy Tótenshe jaǵdaılar Departamentiniń bastyǵy Serik Áýbákirov órt dánekerleý jumystary kezinde qaýipsizdik erejeleriniń saqtalmaýynan nemese apatty jaǵdaıdaǵy elektrqondyrǵylarynan tutanýy múmkin degen eki boljam aıtyp otyr.
«Ákim órttiń neden bolǵanyn jiti tekserýdi tapsyrdy. Osyǵan oraı, oqıǵa ornynda TJD-niń arnaıy zerthanasy jumys istep jatyr. Oqıǵa orny tekserildi, ony QR İİM órt qaýipsizdigi ınstıtýty men Tótenshe jaǵdaılar jónindegi azamattyq qorǵanys komıtetiniń arnaıy mamandary júrgizdi», - dep atap ótti S.Áýbákirov.
Budan ózge, Almaty qalasy İİD bastyǵynyń orynbasary İzbasar Bekturov qaıǵyly oqıǵaǵa qatysty 292 baptyń 3 tarmaǵy (órt qaýipsizdigi erejesiniń saqtalmaýy saldarynan eki jáne odan da kóp adamnyń qaza bolýy) boıynsha qylmystyq is qozǵalǵandyǵyn aıtty.
