Sondaı-aq, taraptar kún tártibindegi halyqaralyq jáne óńirlik ózekti jaıttar, atap aıtqanda, ıadrolyq qarýsyzdaný men taratpaý, kıberqylmys qaterinen tónip otyrǵan jahandyq qaýipsizdikti qamtamasyz etý máseleleri jóninde pikir almasty.

Budan bólek, Nursultan Nazarbaev pen Pak Kyn He kelissóz aıasynda Ońtústik Koreıa prezıdentiniń Astanaǵa 2014 jylǵy maýsymdaǵy memlekettik saparynyń qorytyndysy boıynsha qol jetkizilgen ýaǵdalastyqtardyń iske asyrylý barysyn qarastyrdy.

Ekijaqty baılanystardy odan ári damytý men ózara taýar aınalymyn jandandyrý perspektıvalary aıqyndaldy. Eki eldiń basshylary Qazaqstan men Koreıanyń strategıalyq seriktestigin jańa sapaly deńgeıge kóterý baǵytyndaǵy jumysty jalǵastyrýǵa ýaǵdalasty.

Kelissóz barysynda Koreıa tarapy Qazaqstannyń BUU Qaýipsizdik keńesiniń 2017-2018 jyldardaǵy turaqty emes múshesi bolyp saılanýyna baılanysty Nursultan Nazarbaevtyń ıadrolyq qarýǵa qarsy bastamalarynyń júzege asyrylýynyń qarqyn ala túsetinine senim bildirdi.

Energetıkadaǵy yntymaqtastyqty jandandyrý joldary, munaı men gaz óńdeý, medısınalyq týrızm salalaryndaǵy birlesken jobalardy iske asyrý, sondaı-aq Koreıa Respýblıkasy men Eýrazıalyq ekonomıkalyq odaq arasyndaǵy erkin saýda aımaǵyn qurý múmkinshiligi qarastyryldy.

Koreıa tarapy kólik-tranzıttik ózara is-qımyl perspektıvalaryna erekshe qyzyǵýshylyq tanytty.

Qazaqstan Prezıdenti Tynyq muhıty jaǵalaýyndaǵy Qytaıdyń Lánúngan portynyń qazaqstandyq termınaly qurylysynyń aıaqtalǵanyn atap ótti.

– Bul termınal arqyly qazirdiń ózinde mıllıonǵa jýyq konteıner tasymaldandy. Sonymen birge Qytaımen shekaralas Qorǵas «qurǵaq portyn» Kaspıı teńizindegi Aqtaý teńiz portymen jalǵaıtyn temirjol salynyp, Túrikmenstan jáne Iran arqyly Parsy shyǵanaǵyna deıin temirjol tóseldi. Osy baǵyttardyń bárin koreı bıznesiniń paıdalanýyna bolady, – Memleket basshysy.

Pak Kyn He Nursultan Nazarbaevpen elderimiz arasynda dıplomatıalyq qarym-qatynas ornaǵanyna 25 jyl tolý qarsańynda kezdesip otyrǵanyna aıryqsha qýanyshty ekenin jetkizdi.

– Memleketter basshylarynyń arasyndaǵy ózara senimge negizdelgen  jeke dostyq qarym-qatynastyń qalyptasqany elderimizdiń strategıalyq áriptestiginiń de nyǵaıa túsýine septigin tıgizedi. Qazaqstan men Koreıanyń qarym-qatynasy bir-birin ózara tolyqtyrýshy yntymaqtastyq negizinde jedel qarqynmen damyp keledi, – dedi Koreıa Respýblıkasynyń Prezıdenti.

Sondaı-aq, Memleket basshysy Koreıa Respýblıkasynyń isker toptar ókilderimen kezdesti. 

Kezdesýge iri koreı kompanıalarynyń ókilderi qatysty.

Memleket basshysy Koreıa Respýblıkasy Qazaqstannyń Shyǵys Azıadaǵy negizgi áriptesteriniń bir ekenin, táýelsizdik jyldary osy elden kelgen ınvestısıanyń jalpy kólemi 9 mlrd dollarǵa jetkenin atap ótti.

Qazaqstan Prezıdenti 2015 jyly birqatar syrtqy faktorlar men obektıvti sebepterge baılanysty ózara saýda-sattyq kólemi birshama azaıǵanyn aıtty.  

– Osy oraıda bizdiń ekonomıkalyq yntymaqtastyǵymyzǵa tyń serpin berý mańyzdy. Energetıka, aýyl sharýashylyǵy, mashına jasaý, qurylys, qarjy jáne ınvestısıalar, kólik-logıstıka júıesi ózara is-qımyldyń perspektıvaly baǵyttary bolyp sanalady, – dedi Nursultan Nazarbaev.

Qazaqstan Prezıdenti atap ótkendeı, bizdiń elde ońtústikkoreıalyq kapıtaldyń úlesi bar 465 birlesken kásiporyn jumys isteýde, sońǵy úsh jyldyń ózinde jalpy quny 160 mln dollar bolatyn 14 ınvestısıalyq joba iske asty.

Memleket basshysy ózara tıimdi yntymaqtastyqtyń áleýetin arttyrý úshin Qazaqstanda júrgizilip jatqan ekonomıkany ártaraptandyrý jónindegi qurylymdyq reformalar men sharalarǵa toqtaldy.

– Atap aıtqanda, ınvestısıalyq ahýal men bıznes júrgizý úshin qajet jaǵdaı birtindep jaqsaryp keledi, memlekettik ındýstrıalyq-ınnovasıalyq damý baǵdarlamasy iske asyrylýda. Basymdyǵy bar salalarda ınvestorlarǵa salyq jeńildikteri jasalýda, shaǵyn jáne orta bızneske qoldaý kórsetetin arnaýly sharalar qabyldanýda, – dedi Nursultan Nazarbaev.

Sondaı-aq, Qazaqstan Prezıdenti respýblıkada salyq mólsherlemelerine qatysty zańnamanyń jáne jumyspen qamtý salasyndaǵy zańnamanyń turaqtylyǵyna kepildik berilgenine nazar aýdardy.

– Bizdiń elderimizdiń azamattary úshin vızasyz rejim engizilip, tikeleı áýe reısteri ashyldy, – dedi Nursultan Nazarbaev.

Memleket basshysy Qazaqstan aýmaǵyndaǵy arnaıy ekonomıkalyq jáne ındýstrıalyq aımaqtarda koreı kompanıalaryna óz jobalaryn iske asyrý úshin oryn bólýge ázir ekenin aıtyp, sol aımaqtardy basqarý múkindigin usyndy.  

Budan bólek, Memleket basshysy koreı kompanıalaryn Qazaqstandaǵy memlekettik kásiporyndardy jappaı jekeshelendirý úrdisine, aldaǵy «EKSPO-2017»: bolashaqtyń energıasy» halyqaralyq mamandandyrylǵan kórmesiniń jumysyna, «Astana» halyqaralyq qarjy ortalyǵynyń qyzmetine belsene atsalysýǵa shaqyrdy.

– Biz koreı kompanıalarymen ekonomıkanyń barlyq sektorynda yntymaqtastyq ornatý ázirmiz. Búgingi bizdiń kezdesýimiz elderimizdiń isker toptarynyń ózara tıimdi yntymaqtastyǵynyń jańa múmkindikteri men perspektıvalaryn anyqtap beredi dep úmittenemin, – dedi Nursultan Nazarbaev.

Memleket basshysy sapar aıasynda Ońtústik Koreıanyń Prezıdentimen júrgizilgen kelissózdiń jemisti bolǵanyn aıtyp, onda iskerlik yntymaqtastyq aıasyn keńeıtýdiń jańa múmkindikteri, sonyń ishinde Qazaqstannyń kólik ınfraqurylymyn damytý, EAEO naryǵyna shyǵý perspektıvalary talqylanǵanyn atap ótti.

– Biz Eýrazıalyq ekonomıkalyq odaqpen arada erkin saýda aımaǵyn qurý jóninde áńgimelestik. Bıyl bul uıymǵa tóraǵalyq etip otyrǵan Qazaqstan Koreıanyń osy keńistikke ený jónindegi nıetin quptaıdy. Bul bárimizge jaqsy jáne biz osy ıdeıany ilgeriletetin bolamyz, – dedi Qazaqstan Prezıdenti.