Búgin, 11 qarashada kásipqoı boksshy Qanat Islam Atyraýdaǵy Sabyr Qazybaev atyndaǵy jetimder úıinde bardy.
Sportshy óńirge oblystyq dene shynyqtyrý jáne sport basqarmasynyń shaqyrýymen kelgen.
- Bizdiń sportshylar Qanat Islamdy ózderine úlgi tutady. Onyń jeńisterinen shabyt alady. Áıgili boksshyny jastarǵa sheberlik klasyn ótkizýge jáne birneshe kezdesýler uıymdastyrý úshin shaqyrdyq, - dedi dene shynyqtyrý jáne sport basqarmasynyń basshysy Azamat Beket.
Qanat Islam sheberlik klasyn ótkizbes buryn Sabyr Qazybaev atyndaǵy jetimder úıine bas suqty. Ol balalarmen erkin áńgime aıtyp, olardyń daıyndap qoıǵan konsertin tamashalady. Kezdesý sońynda Qanat Islam balalarǵa plazmalyq teledıdar syılady.
- Sózimniń sońynda sizderge myna bir nárseni aıtqym keledi. Ómirde túrli jaǵdaılar bolady. Keıde salyń sýǵa ketip, bárin tastap jatyp alǵyń keledi. Biraq mundaı kezderde óz-ózińdi qolǵa alyp, tabandylyqty odan ári eseleı túsý kerek. Biz tańdaı qaǵyp júrgen chempıondar jetistikke bir ǵana prınsıptiń arqasynda jetti. Ol - eshqashan berilmeý. Osy erejeni ómirlik ustanym etip alatyn bolsańdar jeńiske jetesińder, - dedi Qanat Islam.
Kezdesýden soń boksshy jergilikti stýdenttermen áńgimelesip, jas sportshylarǵa sheberlik klasyn ótkizdi, Atyraý oblysynyń ákimi Nurlan Noǵaevpen kezdesti.
Aıta ketelik, Qanat Islam 2012 jyly birinshi orta salmaqta WBA Fedecaribe tıtýlyn jeńip alǵan. Sportshy 2008 jylǵy Olımpıadanyń qola júldegeri, sport sheberi. «Astana Arlans» (WSB) komandasynyń kapıtany bolǵan.
Esterińizge salaıyq, 29 qazanda Almatyda ótken jekpe-jekte Qanat Islam gaanalyq Patrık Aloteıdi jeńgen edi. Osylaısha, sportshy kásipqoı boksta 22-shi jeńisine qol jetkizdi. Boksshy jekpe-jekteriniń 18-in nokaýtpen aıaqtaǵan.
