Jemqorlyqqa qarsy is-qımyl jónindegi Ulttyq búro Central Asia Monitor jáne Radiotochka.kz basylymdarynyń Bas redaktory Bıgeldi Ǵabdýllınge qatysty sotqa deıingi tergeýdi bastady, - dep habarlaıdy Qamshy.kz Ulttyq búro baspasóz qyzmetine ilteme jasap.

Qazir Bıgeldi Ǵabdýllın ustalyp, Astana qalasy İİD-niń ýaqytsha ustaý ızolátoryna qamalǵan.

Qylmystyq qýdalaý organy Ǵabdýllındi ózine baǵynyshty aqparat quraldarynda «memlekettik organ basshylaryna qatysty olardyń iskerlik bedelin túsiretin jaǵymsyz materıaldardy jarıalaý arqyly aqparattyq shabýyldardy údetip, syndy doǵarý úshin laýazymdy tulǵalardan óz medıaresýrstaryna memlekettik tapsyrys alyp kelgen» degen málimet taratty.

Vedomstvo sondaı-aq, keıbir sheneýnikterdiń Ǵabdýllınniń múddesin júzege asyrýǵa, memlekettik tapsyrys týraly kelisimderge qol qoıýǵa yqpal etkenin málimdedi.

«Sodan keıin (memlekettik tapsyrym týraly kelisimnen – red.) ǵana olardyń qyzmeti týraly jaǵymdy materıaldar jarıalanǵan. Máselen, Jambyl oblystyq ákimdiginen ol 10 mıllıon teńge kólemindegi búdjet qarjysyn bopsalaǵan. Osyndaı jolmen Ǵabdýllınge taǵy jeti memlekettik organ aqsha aýdarǵan», - delingen habarlamada.

Esterińizge salsaq, buǵan deıin salyq tóleýden jaltardy, alaıaqtyq jasady degen aıyppen Qazaqstan Jýrnalıser Odaǵynyń tóraǵasy Seıitqazy Mataev pen onyń uly, «QazTAG» HAA basshysy Áset Mataev qýǵyndalyp, S. Mataev alty, Á. Mataev bes jylǵa bas bostandyǵynan aırylǵan bolatyn.