Osydan bir apta buryn, Krasnoıarsk óńiriniń Norılsk qalasynyń Daldykan ózeni qyp-qyzyl túske boıaldy. Jergilikti turǵyndar bul erekshe qubylysty vıdeo men foto-ǵa túsirip, ǵalamtor jelilerinde taratty. Birneshe kúnnen soń, Norılsk jaıly búkil álemdik BAQ ókilderi áńgime qozǵady, - dep habarlaıdy Qamshy.kz.

Aldyn ala tekserýdiń nátıjesi boıynsha ózenniń lastaný sebebi: «Norılskıı Nıkel» taý ken óńdiretin metalýrgıalyq kompanıasynyń qoımaljyń jetkizgishteriniń jarylýy. Alaıda, kompanıa basshylyǵy bul máselege qatysty óz kinálárin moıyndamaı jatyr. Reseı ekologıasynyń mınıstri Sergeı Donskıı osy jaǵdaıdy «Rosprırodnadzor» basshysyna óz qolyna alýǵa tapsyrdy. Ǵalamtor jelilerinde bul qubylysty kórgen adamdar «aqyr zamannyń» belgisi dep túsindi.

Keıinnen, jelide «Nadejda» metalýrgıalyq kombınatynyń burynǵy qyzmetkeriniń málimdemesi paıda boldy. Aıta ketetin jaıt, «Nadejda» metalýrgıalyq kombınaty «Norılskıı Nıkel» kompanıasynyń menshigi bolyp tabylady. Qyzmetkerdiń aıtýy boıynsha qoqys qaldyqtary saqtalatyn syıymdylyqtar jıi aǵyp turady. Tipti, qys kezinde qardyń barlyǵy qyzyl túske boıalady.

Alaıda, «Nornıkel» basshylyǵy eshqandaı hımıkat óndiristen bólinbeıdi, qorshaǵan ortany lastamaıdy dep aıtqan bolatyn. Qazirgi kezde, Daldykan ózeni qaıta óz qalpyna keldi. Barlyǵy «aqyr zaman» dep túsingen bul qubylystyń shyn máninde ne sebepti bolǵanyn «Rosprırodnadzor» anyqtaıtynyna senemiz.