Depýtattar Astanaǵa Elbasynyń esimin berýdi usyndy degen aqparat portalymyzda shyqqan bolatyn. Aqparat taralysymen Elorda ataýynyń ózgerýine baılanysty jan-jaqtan ártúrli oı-pikir aıtyla bastady. Qamshy portaly el aldynda júrgen azamattardyń atalmysh másele tóńireginde bildirgen kózqarastaryn oqyrman nazaryna usynyp otyr.

QR Parlament Májilisiniń depýtaty Bekbolat Tileýhan:

«Jalpy bul birinshi ret usynylyp otyrǵan joq. Osy máseleni kezinde Parlament depýtaty Sát Toqpaqbaevtyń (avtor - 2008 jyly Elbasynyń atymen ataýdy usynǵan) tarapynan kóterilgen bolatyn. Shırek ǵasyrlyq merekeniń qarsańynda bul bastamany jeke óz basym qoldaımyn. Nege deseńiz, bul tarıhta bar jaǵdaı. Memleketti qurǵan adamnyń esimimen qalany ataý tájirıbesi bar. Máselen, Vashıngton qalasy barshaǵa málim. Nursultan atyndaǵy qalanyń bolǵany Táýelsizdiktiń sımvoly ispettes. Táýelsiz Qazaqstan men Nazarbaevtyń aty sınonımder sıaqty. Meni jaǵyndy nemese basqa dep túsinseńizder, ózderińiz bilińizder, biraq tarıhı kózqaraspen jáne egemendi eldiń azamaty retinde, muny óte bir ádil usynys dep oılaımyn», - dedi depýtat.

Budan buryn habarlanǵandaı, búgin QR Parlamenti palatalarynyń birlesken otyrysynda «Táýelsizdiktiń 25 jyldyǵy Qazaqstan jetistikteriniń deklarasıasy» qabyldanyp, onda Elbasynyń esimin elordanyń jáne elimizdiń basqa da nysandarynda kórsetý usynylǵan edi. 

Aqyn-jýrnalıst Jumash Kókbóri:

«Máńgilik» depýtat Q. Sultanovtyń memleket basshysynyń esimin  Astanaǵa berý týraly usynysyn, ony qoldaı ketken Kosarevtyń bul qadamdaryn - jeke basqa tabynýshylyq dep baǵalaý kerek!

Birinshiden, N. Nazarbaevtyń kózi tirisinde ol adamǵa astana atyn berý – baryp turǵan jaǵympazdyqtyń jarqyn bir kórinisi dep túsingen jón. Bolmasa, bul adamdar Ult kóshbasshysynan qutyla almaı júr me degen de oıǵa qalady ekensiń... Adam esimin tarıhta qaldyrý úshin, ol pende bul ómirde bolmaýy kerek!..

Búkil álem aldynda kúlkige qalmaıyq desek, bul esersoq usynystarǵa tosqaýyl qoıý kerek! Jáne de ana Sultanov, Kosarev, t.b. kim edi, sol jaǵympazdardy jazalamaı, jaǵdaı túzelmeıtin sıaqty.

1986 jylǵy áıgili Jeltoqsan qasireti óte sala  Ortalyq Komıtettegi bir plenýmda osy Qýanysh Sultanovtyń Kobınniń aldynda: «men jetim edim...» dep botadaı bozdaǵanyn, keshe ózin adam etken D. Qonavty adam demegenin biz umytqamyz joq.

Keshe Kolbınge jaǵympazdansa, búgin Nuraǵańa jaǵympazdanatyndaı, bul pendeniń basyna ne kún týdy eken?..

Bul pende óziniń osy bir ospadar minezi arqyly bizdiń súıikti memleket basshysyn búkil álem aldynda kúlkige qaldyraıyn dep otyrǵany anyq...

Kosarevke «bar bır», onyń erteń baratyn jeri, eli, memleketi bar. Al, Q.Sultanov qaıda barady?..

Mynadaı jaǵympazdarǵa erip, kúlkige qalmaıyq, aǵaıyn?..