2016-2020 jyldar aralyǵynda Maqtaaral, Qazyǵurt, Ordabasy, Saıram, Túlkibas, Saryaǵash aýdandary men Arys, Túrkistan qalalarynda da jemis-jıdek jáne kókónis alqaptarynyń kólemin arttyrý josparlanǵan. Atalǵan aýdandar men qalalar óńdeý baǵytyna bet buryp, ónimderdi naryqqa shyǵarý joldary qarastyrylyp otyr. Maqtaaral, Shardara aýdandary baqsha ónimderin óńdep, túrli shyryndar men konsentrattar shyǵarýdy jolǵa qoıǵandary jón bolar edi.
Oblys boıynsha jylyna 39000 tonna et óńdeı alatyn 47 kásiporyn bar. Mal sharýashylyǵyn damytýdyń 2014-2016 jyldarǵa arnalǵan baǵdarlamasyna sáıkes 149136 iri qaraǵa arnalǵan 6103 mal bordaqylaý alańy iske qosyldy. Osylaısha et óńdeý kásiporyndarynyń qýattylyǵy qosymsha 8141 tonnaǵa artty. Bıyl Báıdibek aýdany ındýstrıaldy aımaǵynda qýattylyǵy 20 myń tonnany quraıtyn et kombınatynyń jobasy maquldandy. Kombınat iske qosylǵanda jańa jumys oryndary ashylyp qana qoımaıdy, halyqtyń etke degen suranysy tolyq qanaǵattandyrylady. Mal sharýashylyǵy órkendeıdi. Oblys boıynsha 2016-2020 jyldar aralyǵynda soıys salmaǵynda et óndirýdi jylyna 208 myń tonnadan 228 myń tonnaǵa deıin arttyrý josparlanýyna sáıkes qaıta óńdeý kásiporyndary shıkizattan tarshylyq kórmeıdi.
Desek te, elimizdiń naryǵynda kórshiles memleketterden qalbyrlanǵan et, sút, shujyq, balyq, syr, taýyqtyń san etteri, taǵy basqalary ákelinetini jasyryn emes. Osynyń saldarynan ózimizdiń ónimder keıde ótpeı de jatady. Otandyq ónimderge suranysty arttyrý úshin taýar sapasyna kóńil bólý kerektigin kásipkerler bilmeıdi deı almaımyz. Álemdik básekelestikte utyp shyǵýdyń eń tıimdi joly – óndirilgen ónimdi ótkize bilý. Bul oraıda taýar sapasy úlken ról atqarady.
Sabyrbek OLJABAI, «Ońtústik Qazaqstan» gazeti.
