Sozaq, Otyrar, Shardara aýdandary túlik tóresi – túıe ósirýge qolaıly. Biraq ta búginde túıe súti men júnine, etine suranys az. Sondyqtan túıe sharýashylyǵy oıdaǵydaı damymaı otyr. Otyrar aýdanynda túıe sútin óńdeıtin seh biraz jyldan beri jumys istep tur. Túrkistan ındýstrıaldy aımaǵynda túıe sútin óńdeý zaýytyn salý kózdelýde. Sozaq, Otyrar aýdandary men Arys, Túrkistan qalalarynan túıe sútin jınaıtyn pýnktter ashylmaq. Jańa joba aıasynda keler jyldary túıe júni men etin óńdeý óndiristeri de eskeriledi. Oblys basshysy Beıbit Bákiruly aımaqtardyń basym baǵyttaryn egjeı-tegjeıli saraptaı kele, aýyl sharýashylyǵy salasyna osyndaı mindetter júktedi.

Iá, óńdeý óndirisi órkendese, ónimdi ótkizý de óristeıdi eken. Endeshe, oblysymyzdaǵy dál qazirgi birinshi kezekte iske asyrar mindet te osy.

2016-2020 jyldar aralyǵynda sút óndirý kólemin jylyna 739 myń tonnadan 832 myń tonnaǵa deıin arttyrý josparlanǵan. Búginde óńirimizde jylyna 130100 tonnaǵa deıin sút óńdeıtin zaýyttar jumys isteıdi. Sút óńdeý kásiporyndarynyń qýattylyǵy qosymsha 8995 tonnaǵa artyp otyr. Áıtse de, súttiń 26,8 paıyzy ǵana (188165 tonna) óńdelgenin eskersek, bul baǵytta áli de kúrdeli máseleler kútip turǵany belgili.

Sabyrbek OLJABAI, «Ońtústik Qazaqstan» gazeti.