2020 jyly asyl tuqymdy mal basy 4 esege artyp, Memleket basshysynyń tapsyrmasyna sáıkes elimizdegi et eksporty 60 myń tonnaǵa jetýi tıis. Alaıda, «QazAgro» ulttyq kompanıasynyń málimetinshe, búginde Qazaqstan shetelge nebári 10-12 myń tonna aralyǵynda et satýda. Elimizdiń ishki naryǵynda da bul sala boıynsha teńgerimsizdik qalyptasýy osydan. Esesine syrttan jetkiziletin sıyr etiniń ımporty óse túsken. Mundaı qarqynmen eksport kólemin 60 myń tonnaǵa jetkizý, árıne, ońaı emes. Sarapshylardyń pikirinshe, osy mejeni baǵyndyrý úshin keminde 300 myń iri qara maldy bordaqyǵa ustaý qajet eken. Bul baǵytta asyl tuqymdy mal sharýashylyǵyn damytýdyń mańyzy aıryqsha ekeni ámbege aıan. Memleket túrli baǵdarlamalar arqyly mal sharýashylyǵyn, onyń ishinde iri qara maldy asyldandyrýǵa basymdyq berip jatyr. Osyǵan oraı ekonomıkasynyń eń negizgi bóligin aýyl sharýashylyǵy salasy quraıtyn Sozaq aýdanyna Fransıadan qomaqty ınvestısıa tartylyp, mal sharýashylyǵyn damytýdy kózdeıtin serpindi joba iske asqaly tur. Joba 2016–2020 jyldarǵa arnalǵan. Bul jóninde aýdan ákimdigi men jobany qarjylandyratyn fransıalyq «Katko» BK» JSHS arasynda ekijaqty memorandým túzilgen.
Investısıa demekshi, qoınaýy qut Sozaq aýdanyna jyl saıyn 80 mlrd. teńge kóleminde ınvestısıa keledi eken. Bul oblys ortalyǵy Shymkent qalasynan keıingi kórsetkish. Alaıda, otandyq jáne sheteldik qarjy kózderiniń negizgi nysanasy aımaqtaǵy ýran óndirisi bolǵandyqtan, kópshiligi órisi tórt túlikke toly óńirdegi mal sharýashylyǵyn jandandyrýǵa táýekel ete bermeıdi. Olarǵa salsaq, qolbaılaý bolatyn birneshe sebepterdi alǵa tartady. Al, fransıalyq «Katko» kompanıasy osy seńdi buzyp, aýdanda mal sharýashylyǵyn órkendetýge qulshynys bildirip otyr. Quny 400 mln. teńgeni quraıtyn jańa jobanyń basty ereksheligi asyl tuqymdy 500 iri qara maldy ósirý arqyly mal bordaqylaý alańyn ashyp, aımaqta et óndirisiniń áleýetin arttyrý. Aıta ketý kerek, jobanyń ǵylymı negizdemesi Qazaq Ulttyq agrarlyq ýnıversıteti mamandarynyń qatysýymen ázirlendi.
Tyń jobanyń óńirimiz úshin tıimdiligi ushan-teńiz. Birinshiden, alǵashqy mezette 500 asyl tuqymdy iri qaranyń tólin ósirý arqyly asyldanǵan mal basyn kóbeıtýge múmkindik týyp otyr. Joba sátimen júzege assa, jyl saıyn olardyń belgili bir mólsherin etke ótkizip, osynda óńdep, et óndirisine keńinen jol ashylady. Ekinshiden, jem-shóp bazasyn jasaqtaý úshin aýdannyń jer qorynan sýarmaly jáne jaıylymdyq alqaptar qarastyrylǵan. Onda aýyl sharýashylyǵy maqsatyndaǵy tehnıkalar parki jasaqtalady. Úshinshiden, jańadan 50 jumys orny ashylady. Joba júzege assa, aýdan ekonomıkasy úshin serpindi qadam bolmaq.
Dáýlet TURSYNULY, «Ońtústik Qazaqstan» gazeti
