Qazaqstan Respýblıkasynyń Investısıalar jáne damý mınıstrligi Aeroǵarysh komıtetiniń tóraǵasy Erkin Shaımaǵambetov bastaǵan delegasıa jumys saparymen Fransıadan oraldy.

Komıtet tóraǵasy jumys sapary barysynda «Airbus Defence and Space» («Airbus D&S») fransýz kompanıasynyń basshylyǵymen kezdesti. Sondaı-aq, «Ǵalam» qazaqstan-fransýz kásipornynyń («Ǵalam» JSHS) Baıqaý keńesiniń (BK) otyrysyna qatysyp, Týlýza qalasyndaǵy ǵarysh qalashyǵyn aralap kórdi.

Qazaqstandyq delegasıa «Astrolabe» kásipornyndaǵy arnaıy «Airbus D&S» optıkalyq qural-saımandarynyń ǵımarattaryn, «Airbus Geo Intellegence» enshiles kásipornynyń jerdi qashyqtyqtan zondtaý derekterin óńdeý jáne taratý ortalyǵyn, «Intespace» kásipornynyń vıbrasıalyq stendin, termovakýýmdyq, reverberasıondyq akýstıkalyq kameralaryn aralap kórdi. Aeroǵarysh komıtetiniń ókilderi «Cite de l’Espace» ǵarysh-parkine baryp, Fransýz Respýblıkasynyń ǵarysh salasyn damytýǵa arnalǵan taqyryptyq ekspozısıalarmen tanysty.

Sonymen qatar, E.Shaımaǵambetov «Týlýza qalasyndaǵy ǵarysh qalashyǵynyń qurylýy men jumys isteý tájirıbesi biz úshin óte qajet. Óıtkeni, biz de Qazaqstanda Ulttyq ǵarysh ortalyǵyn salyp jatyrmyz. Onyń basty nysany fransýzdyq áriptestermen birlesip salyp jatqan ǵarysh apparattaryn qurastyrý-synaý kesheni bolmaq», – dep atap ótti.

Óz kezeginde «Airbus D&S» birlesken qazaqstandyq-fransýzdyq jobalardyń Bas menedjeri Húgo Laport osy kompanıanyń ǵarysh júıeleriniń basshysy, Atqarýshy vıse-prezıdenti Nıkolá Shamýssıdiń atynan E. Shaımaǵambetovti Aerǵarysh komıtetiniń tóraǵasy laýazymyna taǵaıyndalýymen quttyqtady.

«Siz QR IDM Aeroǵarysh komıtetiniń tóraǵasy retinde jańa laýazymda jumys isteı otyryp, Qazaqstan men Fransıanyń ǵaryshtyq baǵdarlamalaryn iske asyrý múddesindegi bizdiń nátıjeli yntymaqtastyǵymyzdy nyǵaıtýǵa, sondaı-aq álemdik ǵarysh qyzmetiniń kóshbasshylarynyń biri retinde, Qazaqstan Respýblıkasynyń rólin nyǵaıtý jónindegi saıasatty odan ári jalǵastyrýǵa yqpal etedi dep senim bildiremiz», -dedi H. Laport.

Budan bólek, quramynda «Qazaqstan Ǵarysh Sapary» UK» AQ Marat Nurǵojın, «Ǵalam» JSHS Bas dırektory Baýbek Oralmaǵambetov bar qazaqstandyq delegasıa «Airbus D&S» strategıalyq seriktes ókilderimen birqatar kezdesýler ótkizdi.

Birlesken jobalardy iske asyrýdyń alǵashqy nátıjeleri qarastyryldy. Qazaqstan Respýblıkasynyń Jerdi qashyqtyqtan zondtaý ǵarysh júıesiniń nátıjeleri – bul ǵarysh túsirilimderiniń halyqaralyq naryqqa shyǵýy.

«Ǵarysh apparattarynyń qurastyrý-synaý keshenin qurý máselesine basa nazar aýdaryldy. Ol úshin qazir Eýropadan tehnologıalyq jabdyqtardy jetkizý júzege asyrylýda», – dep atap ótti M. Nurǵojın.

Sonymen qatar, taraptar odan ári yntymaqtastyq jónindegi perspektıvalyq jobalardy talqylady.