Negizgi kapıtalǵa salynǵan ınvestısıanyń oń dınamıkasy saqtalyp otyr. Bul týraly QR Investısıalar jáne damý mınıstri Jeńis Qasymbek Ortalyq komýnıkasıalar qyzmetinde ótken baspasóz konferensıasynda málim etti.
«2016 jyldyń 8 aıynda negizgi kapıtalǵa salynǵan ınvestısıa kólemi 4,8% ósti (4,3 trln. teńge – 12,6 mlrd. dollar). Negizgi kapıtalǵa salynǵa ınvestısıanyń úshten birin syrtqy ınvestısıa quraıdy (35,4 % nemese 1,3 trln. teńge (3,8 mlrd. doll.). Bıyl birinshi jartyjyldyqta tikeleı sheteldik ınvestısıanyń kelýi artyp, 5,7 mlrd. dollardy qurady», - dep atap ótti mınıstr.
Sondaı-aq mınıstr ınvestısıa kólemi artqan salalardy atady.
«Indýstrıalandyrý baǵdarlamasynyń arnaıy baǵyttalǵan salalaryna: hımıa ónerkásibi, farmasevtıka, mashına jasaýǵa keletin ınvestısıa kólemi artty. Sheteldik ınvestısıa tartý boıynsha oń dınamıkanyń qalyptasýy elimizdegi ınvestısıalyq ahýaldyń jaqsarýymen baılanysty»,-dedi J.Qasymbek.
QR Investısıalar jáne damý mınıstriniń aıtýynsha, 2017 jyly EYDU-nyń Investısıalar komıtetine kirý boıynsha josparly jumys júrgizilýde. Bul Qazaqstannyń ınvestısıalyq ahýaly álemdik standarttarǵa sáıkes ekenin kórsetedi.
Mınıstr J.Qasymbek ınvestorlarǵa kórsetiletin qolaıly jaǵdaılarǵa da toqtaldy.
«2016 jyldan bastap ınvestorlar úshin «bir tereze» qaǵıdaty (300-den astam memlekettik qyzmet) engizildi. 3500-den astam ınvestorǵa keńes berilse, 3300-den astamyna memlekettik qyzmet kórsetildi. Osy múmkindikti paıdalana otyryp, kelesi jyldan bastap «bir tereze» elektrondy formatqa kóshetinin aıta keteıin»,-dedi Jeńis Mahmýduly.
