2016 jyldyń qazan aıynda Brazılıanyń Rıo-de-Janeıro qalasynda 24-shi Dúnıejúzilik taý-ken kongresi jáne XXIV World Mining Congress & Expo 2016 (WMC) taý-ken ónerkásibi úshin mamandandyrylǵan tehnologıalar men jabdyqtar kórmesi ótedi. Atalmysh sharaǵa álemniń túpkir-túpkirinen 4500-den astam maman qatysady, dep habarlaıdy Dúnıejúzilik Taý-ken Kongresiniń baspasóz qyzmeti.
İs-shara aıasynda 2018 jyly Astanada Dúnıejúzilik Taý-ken Kongresin ótkizý quqyǵynyń estafetasyn saltanatty túrde Qazaqstanǵa tapsyrý rásimi bolady. Qazaqstan delegasıasynyń quramyna memlekettik qurylym men iri taý-ken metalýrgıalyq keshen kompanıalarynyń ókilderi kiredi.
«2018 jyly Qazaqstanda Dúnıejúzilik Taý-ken Kongresin ótkizý elimizdiń taý-ken salasy boıynsha ınvestısıalyq áleýetin aıshyqtaýǵa, álemdik jáne bastaýysh kompanıalardy tartýǵa múmkindik beredi. Astanada osyǵan deıin jeti ret taý-ken metalýrgıalyq kongresin ótkizdik. Bizde úlken masshtabta halyqaralyq is-shara uıymdastyrý turǵysynan mol tájirıbe bar»,-dedi QR Investısıalar jáne damý mınıstriniń birinshi orynbasary – 2018 jyly DTK Ulttyq uıymdastyrý komıteti tóraǵasynyń orynbasary A.Raý.
Qazaqstandyq delegasıa álemdik taý-ken óndirý kompanıalarynyń, taý-ken ınstıtýttary men ýnıversıtetteriniń basshylarymen ekijaqty kezdesýler ótkizetin bolady. Onda ǵylymı saladaǵy ózara is-qımyldar men birlesken jobalardyń jaıy talqylanady. Sonymen qatar, Qazaqstannyń Taý-ken metalýrgıalyq áleýetin tanystyryp, 2018 jyly Dúnıejúzilik Taý-ken Kongresin ótkizý kezeńderine daıyndyq máselelerin talqylaıtyn jabyq jıyn ótedi.
Budan bólek, qazaqstandyq delegasıanyń Rıo-de-Janeıroǵa barǵandaǵy maqsattarynyń biri halyqaralyq seriktestermen yntymaqtastyqty keńeıtý jáne Qazaqstanǵa álemdik taý-ken bıznesi men ǵylymyn tartý bolyp tabylady.
Eske sala keteıik, 2013 jyly Monrealda Dúnıejúzilik Taý-ken Kongresiniń 23-i otyrysy ótken bolatyn (World Mining Congress 2013). Ol kezde Qazaqstan Respýblıkasynyń ótinishi retinde kún tártibindegi bir másele 2018 jyly Astanada 25-shi Dúnıejúzilik Taý-ken Kongresin ótkizý bolatyn. Kongresti uıymdastyrý komıtetiniń músheleri biraýyzdan Qazaqstannyń ótinishine qoldaý bildirip, daýys berdi.
