Venada (Avstrıa Respýblıkasy) ekonomıkalyq, aýyl sharýashylyǵy, tabıǵat qorǵaý, ónerkásiptik, tehnıkalyq jáne tehnologıalyq yntymaqtastyq jónindegi Qazaqstan-Avstrıa úkimetaralyq komısıasynyń (ÚAK) 7-otyrysy ótti. Onda QR Investısıalar jáne damý mınıstrligi Tehnıkalyq retteý jáne metrologıa komıteti men Avstrıa Standarttaý ınstıtýty arasynda ózara yntymaqtastyq týraly Memorandýmǵa qol qoıyldy.

Qujat Qazaqstan ekonomıkasynyń basym salalaryn standarttaýdy damytýǵa Avstrıa tarapynyń qatysýyn qamtamasyz etýge baǵyttalǵan. Taraptardyń aıtýynsha, Standarttaý salasyndaǵy yntymaqtastyq ekonomıkalyq qatynasty damytýdyń jáne saýdadaǵy tehnıkalyq kedergilerdi alyp tastaýdyń basty quraly bolyp tabylady.

Sondaı-aq, taraptar Memorandýmdy oryndaýǵa arnalǵan Jol kartasy jobasyn kelisti. Onda tehnıkalyq sarapshylarǵa oqý baǵdarlamalaryn ázirleý, birlesken semınarlardy ótkizý jáne standarttaý salasynda tájirıbe almasý, onyń ishinde qurylys, qyzmet qórsetý, qyzmetkerler quramyn sertıfıkattaý, jańǵyrtylatyn energıa kózderi jáne t.b. baǵyttar boıynsha ózara yntymaqtastyq múddeleri anyqtaldy.

Qazaqstan-Avstrıa úkimetaralyq komısıanyń otyrysyna QR Syrtqy ister mınıstriniń orynbasary R. Vasılenko jáne Avstrıanyń Ǵylym, zertteý jáne ekonomıka mınıstriniń orynbasary M. Gırlınger, sonymen birge QR IDM Tehnıkalyq retteý jáne metrologıa komıteti men «Qazaqstan standarttaý jáne sertıfıkattaý ınstıtýty» RMK ókilderi qatysty.

Sonymen birge, komısıa otyrysynda aýyl sharýashylyǵy, energetıka, qorshaǵan ortany qorǵaý, azamattyq ǵarysh, densaýlyq saqtaý, aımaqaralyq yntymaqtastyq  jáne t.b. máseleler talqylandy.