21 qazan kúni Rıo-de-Janeıroda Dúnıejúzilik Taý-ken Kongresiniń dástúrli rámizi «Maı shamdy», ıaǵnı, Kongresti ótkizý quqyǵy estafetasyn saltanatty túrde Qazaqstanǵa tapsyrý rásimi ótti. Saltanatty rásim kezinde Brazılıanyń Taý-ken óndirý qaýymdastyǵynyń basshysy Hose Fernando Koýra, DTK 2016 Tóraǵasy Jar Karlos Koppe (Brazılıa), DTK Tóraǵasy Djozef Dýbınskı (Polsha), VALE Bas atqarýshy dırektory Mýrılo Ferreıra, qazirgi Halyqaralyq uıymdastyrý komıtetiniń múshesi, QR Investısıalar jáne damý mınıstrligi Indýstrıaldy damý jáne óndiristik qaýipsizdik komıteti tóraǵasynyń orynbasary Qanat Baıtov sóz sóıledi.
«Taý-ken metalýrgıalyq keshen Qazaqstan úshin eldiń ekonomıka salasynda mańyzdy jobalardyń biri bolyp tabylady. Jalpy óndiristik kásiporyn salasynda TMK 18% quraıdy. Sondyqtan, 2018 jyly Astanada Dúnıejúzilik Taý-ken Kongresin ótkizý biz úshin óte mańyzdy oqıǵa bolmaq. Bul óz kezeginde eldiń barlyq sektoryna oń yqpal eteri sózsiz. Búginge deıin jınaǵan tájirıbemiz ben bilimimizge súıene otyryp, 2018 jyly DTK-in joǵary halyqaralyq deńgeıde ótkizetinimzge senimdimin»,-dedi Qanat Baıtov.
Sonymen qatar, DTK-iń jabylý saltanatynda osy kúnge deıin Qazaqstanda eki ret bolǵan, Astana Mining & Metallurgy Halyqaralyq Taý-ken metalýrgıalyq Kongresine qatysqan profesor Djozef Dýbınskı 2018 jyly Qazaqstan Dúnıejúzilik Taý-ken Kongresin sátti ótkizetinine senim bildirdi. Budan bólek, 2018 jyly Astanada ótetin Kongres ataýly eki datany da atap ótetin bolady. Iaǵnı, Kongres 25-shi ret ótedi jáne onyń qurylǵanyna 60 jyl tolady.
Saltanatty rásim qorytyndysy boıynsha Brazılıanyń Taý-ken óndirý qaýymdastyǵynyń basshysy Hose Fernando Koýra DTK dástúrli sımvoly «Maı shamdy» Qazaqstan Respýblıkasynyń Tótenshe jáne Ókiletti elshisi Qaırat Sarjanovqa tapsyrdy.
Dúnıejúzilik Taý-ken Kongresi 2016 aıasynda ekijaqty birqatar kezdesýler ótti. Onda DTK tehnologıalyq máseleleri talqylanyp, jańashyldyqtar usynyldy. Iaǵnı, ekonomıkalyq turǵyda kompanıalardy basqarý, halyqaralyq qarjylandyrý men yntymaqtastyq sıaqty ózekti taqyryptar talqyǵa tústi. Qazaqstandyq delegasıa quramyna Qazaqstannyń memlekettik salalarynyń, ınstıtýttardyń, TMK iri profıldi kompanıalardyń ókilderi jáne óz kezeginde DTK 2018 operatory bolyp tabylatyn Iteca kórme kompanıasynyń ókilderi kirdi.
«Osyndaı aıtýly sharalardy uıymdastyrý biz úshin erekshe mańyzdy. Óıtkeni, bul jerde áleýetti ınvestorlar izdeýde jáne saladaǵy zamanaýı jetistikterdi tanyp bilýde jańa múmkindikter ashylady. Sonymen birge, biz ózimizdiń qyzmetimiz týraly jáne qol jetken tabystarymyz jaıynda taý-ken salasy mamandaryna keńirek tanystyramyz. Bizdiń sapardyń maqsaty – geologıa jáne jer qoınaýyn paıdalaný salasynda eki eldiń jáne kompanıalar arasyndaǵy yntymaqtastyqty damytyp, ózara tájirıbe almasý. Geologıa salasynda halyqaralyq yntymaqtastyqty nyǵaıtý boıynsha dıalog ornatýǵa jáne Qazaqstanda júzege asyrýǵa bolatyn tartymdy jobalardy ınvestorlarǵa usynýǵa daıynbyz. Elimizdiń jer kólemi men qoınaýyndaǵy qazba baılyqtaryn eskersek, bolashaǵy zor ondaǵan kenishterdiń ashylatyny anyq. Tipti olardyń arasynda teńdesi joq kenishter de bolýy múmkin. «Anglo-American» (Ulybrıtanıa), «Vale» (Brazılıa) jáne «NMDC» (Úndistan) sıaqty álemdik iri korporasıalarmen ótken kezdesýlerdiń nátıjesinde endigi yntymaqtastyqty Qazaqstan aýmaǵynda jalǵastyrýǵa ýaǵdalastyq» -dep atap ótti «Qazgeologıa» AQ Basqarma tóraǵasy Ǵalym Nurjanov.
Esterińizge sala keteıik, 2018 jyly 19-22 maýsymda Astanada 25-shi Dúnıejúzilik Taý-ken Kongresi ótedi. Atalǵan shara dástúrli AstanaMining & Metallurgy halyqaralyq taý-ken metalýrgıa Kongresi bazasy aıasynda uıymdastyrylady.
